2014-08-21 18:02

უკრაინაში, ქალაქ დონეცკში ჭურვის აფეთქების შედეგად საქართველოს საკონსულოს შენობა დაზიანდა. საქართველოს საგარეო საქმეთა სამინისტროს ინფორმაციით , აღნიშნულ შემთხვევას საქართველოს საკონსულოს თანამშრომლებს შორის მსხვერპლი არ მოჰყოლია.

"საქართველოს საგარეო საქმეთა სამინისტრო კიდევ ერთხელ ეხმაურება უკრაინაში მიმდინარე მოვლენებს და შეშფოთებას გამოთქვამს ბოლო პერიოდში აღმოსავლეთ უკრაინის რეგიონებში საბრძოლო მოქმედებების ესკალაციასთან დაკავშირებით, რაც მშვიდობიან მოსახლეობას შორის დიდძალ მსხვერპლს იწვევს. საქართველოს საგარეო საქმეთა სამინისტრო მიიჩნევს, რომ მშვიდობიანი, დემოკრატიული ქვეყნის ტერიტორიაზე ტერორიზმის, სეპარატიზმისა და ექსტრემიზმის ნებისმიერ გამოვლინებას უნდა მიეცეს სათანადო, უმკაცრესი შეფასება.

საქართველოს საგარეო საქმეთა სამინისტრო კიდევ ერთხელ უცხადებს მტკიცე მხარდაჭერას უკრაინის მთავრობასა და ხალხს და იმედს გამოთქვამს, რომ საერთაშორისო საზოგადოების მხარდაჭერით, უკრაინის მთავრობა მოახერხებს ქვეყნის სუვერენიტეტისა და ტერიტორიული მთლიანობის აღდგენას მის საერთაშორისოდ აღიარებულ საზღვრებში და მოსახლეობისთვის მშვიდობიანი და უსაფრთხო გარემოს უზრუნველყოფას", - ნათქვამია საგარეო საქმეთა სამინისტროს განცხადებაში.