დაბა ჩოხატაურში, აღმაშენებლის ქუჩაზე, უცნობი ნივთიერების გაჟონვის გამო, იქ მცხოვრები მოსახლეობის ევაკუაცია დაიწყეს. ინფორმაციას აღნიშნულის შესახებ „გურიანიუსი“ ავრცელებს.
გამოცემის ცნობით, ერთ-ერთმა მცხოვრებმა, რომელიც ჯართს აგროვებს, რამდენიმე დღის წინ კონტეინერი იპოვა და მისი გახსნის მცდელობის დროს თეთრი კვამლი წარმოიშვა. ხელისუფლებას ამის შესახებ, მას შემდეგ შეატყობინეს, რაც მიმდიბარე ტერიტორიაზე მცხოვრებთა ეზოებში მცენარეები გახმა.
„უცნაური სუნი ტრიალებდა. თავბრუს ხვევა, ღებინების შეგრძნება რამდენიმე ადამიანს ახლაც აქვს,“ _ ამბობენ ადილობრივები.
ერთ-ერთის თქმით, შემთხვევის მეორე დღეს მას სასწრაფო სამედიცინო დახმარების გამოძახება და გადასხმაც დასჭირდა.
ამ წუთებში მიმდებარე ტერიტორიიდან მოსახლეობის ევაკუირება ხდება. ადგილზე იმყოფებიან ადგილობრივი ხელისუფლების, სამაშველო სამსახურისა და პოლიციის თანამშრომლები. თბილისიდან გამოძახებულია სპეციალური ბრიგადა, რომელიც დაადგენს, რასთან გვაქვს საქმე.
