დიდუბის სკვერში შეზღუდული შესაძლებლობების მქონე ბავშვებისათვის დადგმული საქანელა ადგილობრივი მცხოვრებლებმა პროტესტის ნიშანად ჩამოხსნეს.
მათ „ფონდი თბილისის მოზარდთა სახლის“ წარმომადგენლებს, რომელთა ინიციატვითაც დაიდგა აღნიშნული ატრაქციონი მოუწოდეს , რომ „ასეთი“ ბავშვებისთვის სხვა სკვერი ენახათ,- ამის შესახებ „პირველ რადიოს“ ფონდის სამოქალაქო კლუბების კოორდინატორმა ექსკლუზიურად აცნობა.
მისი თქმით, ფონდს ჰქონდა ინფორმაცია, რომ ამ რაიონში სამი შშმ ბავშვი ცხოვრობდა ამიტომ დაიწყო ხელმოწერების შეგროვება და დიდუბის რაიონის გამგეობის დახმარებით სკვერში დაიდგა საქანელა.
მისივე ინფორმაციით აღნიშნულ საქანელაზე დაახლოებით 11-მდე მოზარდი ერთდროულად დადგა და ჩამოვარდა. სწორედ ამან გამოიწვია მშობლების გაღიზიანება და მათ ადგილზე პატრულიც კი გამოიძახეს. ისინი საქანელის გასწვრივ სპეციალური ბანერის დადგმას ითხოვდნენ.
„ჩვენ , რომ მივედით ადგილზე საქანელა უკვე ჩამოხსნილი დაგვხდა. ადგილზე გაცოფებული მშობლები დაგვხვდნენ , რომლებიც ჩხუბობდნენ , რომ „ეგეთი“ ბავშვებისთვის სკვერები სხვაგან მოაწყეთო. ბავშვები ჩამოცვივდნენო. ბანერსაც ითხოვდნენ ოღონდ რაში სჭირდებოდათ ვერ მივხვდი. რა ბანერზეა საერთოდ ლაპარაკი, ელემენტალურია, რომ 11 მოზარდი ერთდროულად ერთ საქანელაზე ვერ დაეტევა და ჩამოვარდება. გაოცებული ვარ. ასეთი მსოფლმხედველობა და ასეთი აგრესია ... ძალიან მოულოდნელი და სამწუხარო სანახავი იყო იქ რაც მოხდა“,-განაცხადა ფონდის წარმომადგენელმა „პირველ რადიოსთან“.
