ნატოს გენერალური მდივნის ანდერს ფოგ რასმუსენის განცხადებით, ის, რასაც ახლა რუსეთი უკრაინაში აკეთებს, ევროპაში ბერლინის კედლის დანგრევის შემდეგ დამყარებულ მშვიდობასა და უსაფრთხოებას უქმნის საფრთხეს.
ამის შესახებ ანდერს ფოგ რასმუსენმა გერმანიის კანცლერთან შეხვედრის დასრულების შემდეგ, ბერლინში გამართული პრესკონფერენციის დროს განაცხადა. ნატოს გენმდივნის თქმით, დაუშვებელია ცივი ომის ეპოქაში დაბრუნება, მაგრამ დაუშვებელია ისიც, რომ ევროპის კონტინენტზე ვინმემ გავლენის ახალი ხაზები გაავლოს.
ფოგ რასმუსენმა განაცხადა, რომ ნატო აპირებს გადადგას ახალი ნაბიჯები კოლექტიური უსაფრთხოების პრინციპის გამყარების მიზნით და "მოქმედების გეგმას" ამ მიმაღტულებით ალიანსი უელსის სამიტზე წარმოადგენს.
ნატოს გენმდივანმა რუსეთს "კურსის გადახედვისკენ" და "მის მიმართ ნდობის აღდგენის ხანგრძლივი პროცესის დაწყებისკენ" მოუწოდა.