2015-10-08 23:28

ამ დრომდე დარეგისტრირებული იმ ავიადარტყმებიდან, რომლებსაც რუსეთი სირიაში ახდენს, 90% მიმართულია არა "ალ ქაედას" ან "ისლამური სახელმწიფოს", არამედ ასადის ოპოზიციის განლაგებებისკენ, - ამის შესახებ აშშ-ის სახელმწიფო დეპარტამენტის განცხადებაშია აღნიშნული.

ჯონ კირბის განცხადებით, შექმნილი მდგომარეობა ხელს აძლევს მხოლოდ ბაშარ ასადს, რომელიც აგრძელებს საკუთარი ხალხის წინააღმდეგ ბრძოლას. აშშ ასევე აცხადებს, რომ "რუსეთი აგრძელებს ბაშარ ასადის მხარდაჭერას". 

ამ დროს კი რუსული მხარე აცხადებს, რომ აქტიურად ბომბავს "ისლამური სახელმწიფოს" ტერიტორიას. თავდაცვის მინისტრმა შოიგუმ განაცხადა, რომ რუსეთმა პირველად დაბომბა "ისლამური სახელმწიფოს" პოზიციები რაკეტებით, თუმცა, დღეს გავრცელებული ინფორმაციით, რუსეთის მიერ სირიისთვის დამიზნებული რაკეტები ირანში ჩამოვარდა.