-
2015-10-06 14:42
ნატოს გენერალურ მდივანს დამაჯერებლად არ მიაჩნია რუსეთის განმარტებები, რომელთა თანახმადაც თურქეთის საჰაერო სივრცის დარღვევა შეცდომა იყო, რადგან ეს ორჯერ მოხდა და რამდენიმე წამზე მეტხანს გრძელდებოდა.
რუსეთის სამხედრო თვითმფრინავმა კვირას თურქეთის საჰაერო სივრცე დაარღვია, რაც ოთხი დღის განმავლობაში მეორე ინციდენტი იყო და თურქული მხარე იძულებული გახდა, რუსეთის ელჩი განმარტების მიღებისა და პროტესტის გამოხატვის მიზნით გამოეძახა.
შაბათს თურქეთმა, რომელიც ნატოს წევრ ქვეყნებში არმიის სიდიდის მიხედვით მეორე ქვეყანაა, ორი F-16 გამანადგურებელი ააფრინა რუსული სამხედრო ავიაციის კუთვნილ თვითმფრინავთან შესახვედრად, სამხრეთის პროვინცია ჰატაიში საჰაერო სივრცის დარღვევის გამო.
მოსკოვმა, რომლის ქმედებებიც აშშ-მა და ნატოს წევრმა, ასევე პარტნიორმა ქვეყნებმა დაგმეს, განაცხადა, რომ შემთხვევა არახელსაყრელი მეტეოროლოგიური პირობებით იყო გამოწვეული.
"მოტივებზე ვარაუდის გამოთქმას არ ვაპირებ, მაგრამ ეს შემთხვევითობას არ ჰგავს... თანაც, ასეთი შემთხვევა ორი გვქონდა", - განაცხადა იენს სტოლტენბერგმა ბრიფინგზე ბრიუსელში.
ნატოს გენმდივანმა თქვა, რომ მომხდარის "არანაირი, რეალური ახსნა ნატოს არ მიუღია". მან ასევე თქვა, რომ პირდაპირ მოსკოვს არ დაკონტაქტებია, მაგრამ ნატო არ გამორიცხავს რუსეთთან კომუნიკაციისთვის თავისი სამხედრო ხაზების გამოყენებას.
"როიტერი", ჰუმეირა ფამუქი, რობინ ემმოტი.