2014-06-07 09:08

ქართველი ჯარისკაცები მისიაში ჩართვით ევროპის უსაფრთხოებისა და თავდაცვის პოლიტიკის იმპლემენტაციის მონაწილეები ხდებიან , – ამის შესახებ ევროკავშირის ელჩმა საქართველოში ფილიპ დიმიტროვმა დღეს ქართველი სამხედროების ცენტრალური აფრიკის რესპუბლიკაში გამგზავრების ცერემონიაზე სიტყვით გამოსვლისას განაცხადა. 

"ქართველი ჯარისკაცები მისიაში ჩართვით ევროპის უსაფრთხოებისა და თავდაცვის პოლიტიკის იმპლემენტაციის მონაწილეები ხდებიან. ამაყი ვარ, რომ ქართველი ჯარისკაცები ჩვენს რიგებში იქნებიან. თქვენი გამოცდილება არის ძალიან ფართო. თქვენ დაამატკიცეთ თქვენი უნარი, მამაცობა და ეფექტურობა. ერთ დროს, ჩემს ქვეყანაში, სანამ ის გახდებოდა ევროკავშირისა და ნატო-ს წევრი, ჰქონდათ მარტივი პრინციპი – იმოქმედე ისე, როგორც წევრი ქვეყნები იქცევიან და ეს დროც დადგება. მე ვურჩევ საქართველოს მთავრობას, იგივე პრინციპით იმოქმედოს. თქვენ ხართ ქვეყანა, რომელიც იქნება ნათელი დადასტურება იმისა, რომ ეს პრინციპი მუშაობს. მადლობა ყველაფრისთვის, რაც გააკეთეთ აქამდე და რასაც მომავალში გააკეთებთ ევროპის ძალების საერთო დროშის ქვეშ", - მიმართა დიმიტროვმა ჯარისკაცებს.

საქართველოს შეიარაღებული ძალები ევროკავშირის ეგიდით წარმოებულ ცენტრალური აფრიკის რესპუბლიკის სამშვიდობო მისიაში პირველად ერთვება. სამშვიდობო ოპერაციაში მონაწილეობას ბათუმის ცალკეული მსუბუქი ქვეითი ბატალიონის ერთი ასეულის სამხედრო მოსამსახურეები მიიღებენ. ქართველი სამხედრო მოსამსახურეები ექვსთვიან სამშვიდობო მისიას ცენტრალური აფრიკის რესპუბლიკის დედაქალაქ ბანგიში შეასრულებენ.