2015-08-26 16:30

ბათუმში, "ალი და ნინოს" ქანდაკების სხვა ადგილას გადატანის პროცესში ადგილობრივი კეთილმოწყობის სამსახურის თანამშრომლებმა დაუდევრობით დაამსხვრიეს ერთერთი ფიგურა, რომელიც მხოლოდ ცალი მხრიდან ასწიეს თოკით - ამის შესახებ "ფეისბუქზე" წერენ და ფოტოს ავრცელებენ.

ამ ფაქტის თვითმხილველი ნანა თვალავაძე, რომელმაც ფოტო ადგილზე გადაიღო, წერს: "გული გამიჩერდა! მავნებლები! ალი და ნინოს ქანდაკების ე.წ. ,,გადატანის'' დროს ერთ-ერთი ფიგურა ასწიეს მხოლოდ ერთი თოკით, ჩამოუვარდათ და დაამსხვრიეს ეს სილამაზე! ძალიან ცუდად ვარ!!!"

"ნეტგაზეთის" ცნობით, როგორც კომპანია "არნაბი 21"-ის წარმომადგენელი მამუკა ჟღენტი ამბობს, ძეგლის ერთი ნაწილი მცირედით დაზიანდა, თუმცა, მისივე განცხადებით, ეს დაზიანება ერთ საათში აღმოფხვრილი იქნება.

კომპანიამ, რომელსაც მამუკა ჟღენტი წარმოადგენს, "ბათუმის ბულვარის" ადმინისტრაციის მიერ 5 ივნისს გამოცხადებულ ტენდერში გაიმარჯვა. ტენდერი „ალი და ნინოს“ სხვა ადგილზე გადასატანად იყო გამოცხადებული. სატენდერო პირობების მიხედვით, ტენდერში გამარჯვებული პირი ვალდებული იყო, სატენდერო პირობების სრული დაცვით განახორციელებინა ბათუმის სანაპიროზე არსებული ქანდაკების „ალი და ნინოს“ ადგილმონაცვლეობა.

ბულვარის ადმინისტრაციის ხელმძღვანელი გიორგი ზირაქიშვილი აცხადებს, რომ ძეგლს 2-3 ფრთა აქვს დაზიანებული და იგი ერთ კვირაში აღდგება. მამუკა ჟღენტის თქმით, ძეგლის ახალ ადგილზე მონტაჟი 5 სექტემბერს დასრულდება და იგი დღევანდელი ადგილსამყოფელიდან 50 მეტრში გადაინაცვლებს.

ქანდაკების ადგილმონაცვლეობის აუცილებლობა, როგორც ბულვარის ადმინისტრაციაში აცხადებენ, ქანდაკების ტექნიკური ნორმების დარღვევით დადგმამ გამოიწვია: "მძიმე ქანდაკების ზღვასთან ახლოს განთავსებამ საფრთხე შეუქმნა „ალის და ნინოს“, რადგან ტალღების მიმოქცევის შედეგად, ქანდაკებას საძირკველი დაუზიანდა".

ბათუმის საკრებულოს წევრი და "ერთიანი ნაციონალური მოძრაობის" წარმომადგენელი გიორგი კირთაძე ამბობს, რომ ძეგლის გადატანა უკანონოდ მიმდინარეობს, რადგან ამაზე არ არსებობს საკრებულოს შესაბამისი გადაწყვეტილება, რასაც უარყოფს "ბათუმის ბულვარის" ადმინისტრაცია და ამბობს, რომ ტენდერი კანონის სრული დაცვით განხორციელდა. კირთაძის თქმით, გადატანის მოტივაციის მიხედვით, ძეგლის 50 მეტრით ადგილმონაცვლეობა საფრთხეს არ ამცირებს და აუცილებელია ნაპირსამაგრი სამუშაოების ჩატარება და არა ძეგლის გადატანა.

ძეგლის ადგილმონაცვლეობისთვის ბიუჯეტიდან გამოიყო 234 975 ლარი. სატენდერო პირობების მიხედვით, დემონტაჟისა და მონტაჟის დროს ქანდაკების დაზიანების შემთხვევაში, სრული მატერიალური პასუხისმგებლობა ეკისრება მიმწოდებელს.

„ალი და ნინოს“ ავტორი, უცხოეთში მოღვაწე ქართველი მოქანდაკე თამარ კვესიტაძეა. „ბათუმის ბულვარის“ ადმინისტრაცია ვალდებულია ქანდაკების ადგილმონაცველობა შეათანხმოს ავტორთან. ბულვარის ადმინისტრაციის ხელმძღვანელის, გიორგი ზირაქაშვილის თქმით, ეს შეთანხმება თამარ კვესიტაძესთან ოფიციალურად მიღწეულია. „ალი და ნინო“ ზღვის სანაპიროდან, რამდენიმე მეტრით ზემოთ, ბულვარის მიმართულებით გადაინაცვლებს.