-
2014-06-04 11:52
„ის რაც ხდება აფხაზეთში ღიადაა დეკლარირებული, ესაა გადაადგილება“, - განაცხადა ღარიბაშვილმა აფხაზეთში მიმდინარე საკითხების კომენტირებისას.
პრემიერმინისტრი ირაკლი ღარიბაშვილი ვერ ხედავს კავშირს რუსეთის ინტერესებსა და აფხაზეთში განვითარებულ მოვლენებს შორის და მიიჩნევს, რომ აფხაზეთში განვითარებული მოვლენები არ უკავშირდება საქართველოს მხრიდან ევროკავშირთან ასოცირების ხელშეკრულების ხელმოწერის ჩაშლის მცდელობას. მისივე თქმით, ოფიციალური რუსეთი შემხვედრ კეთილგანწყობილ ნაბიჯებს დგამს და ოფიციალურმა პირებმა არაერთხელ განაცხადეს, რომ არ აპირებენ ჩაერიონ საქართველოს მიერ ევროკავშირთან ასოცირების პროცესში.
„ჩემი აზრით, ამ ეტაპზე აჟიოტაჟის ატეხვა საჭირო არ არის. ეს არის ჩვეულებრივი საკადრო გაადაადგილება. იყო სპეკულაციები, რომ შეიძლება გალის მოსახლეობას რაღაც პრობლემები შეექმნას, თუმცა ჩვენ ვაკვირდებით ყველაფერს და მოგვიანებით შეგვეძლება უფრო რეალური კომენტარების გაკეთება.
დაველოდოთ, ჩვენ რეალურად დავიწყეთ აფხაზ და ოს ძმებთან შერიგების პროცეს. იცით, რომ შევცვალეთ ის რიტორიკა, რომელიც წინა ხელისუფლებას ჰქონდა აფხაზი და ოსი ხალხის მიმართ. რაც შეეხება, უკავშირდება თუ არა ასოცირების ხელშეკრულების ხელმოწერა აფხაზეთში მიმდინარე მოვლენებს, მიმაჩნია, რომ არ უკავშირდება.
რუსეთის ოფიციალურმა ხელისუფლებამ დაადასტურა, რომ არ აპირებს ჩაერიოს საქართველოს ასოცირების ხელშეკრულების ხელმოწერის პროცესში. ამიტომ ამ ეტაპზე ვერ ვხედავთ წინაპირობას, რომ გართულებას უნდა ველოდოთ. მიმაჩნია რომ ასოცირების ხელშეკრულება და აფხაზეთში მიმდინარე მოვლენები ერთმანეთთან კავშირში არ არის, იქ მიმდინარეობს გადაადგილება", - განაცხადა პრემიერმა.