2020-03-08 22:09

თბილისში, პაბლო პიკასოს ქუჩაზე მომხდარი კაცის მკვლელობის ბრალდებით ერთი პირი დააკავეს. შემთხვევა დღეს, 8 მარტს დილით, ბრალდებულის საცხოვრებელ სახლში მოხდა.

შინაგან საქმეთა სამინისტროს ინფორმაციით, მოკლულმა პირმა ბრალდებულს საკუთარ სახლში მიაკითხა და ცივი იარაღით სხეულზე ჭრილობები მიაყენა, რის შემდეგაც ბრალდებულმა მას ცეცხლსასროლი იარაღით სასიკვდილო ჭრილობები მიაყენა. უწყების ცნობით, ამის შემდეგ ბრალდებულმა შემთხვევის ადგილი დატოვა და სამკურნალო დაწესებულებაში მივიდა, სადაც შესაბამისი დახმარება გაეწია.

მომხდარზე გამოძიება სისხლის სამართლის კოდექსის 108-ე და 236-ე მუხლის მე-4 ნაწილით მიმდინარეობს, რაც განზრახ მკვლელობასა და ცეცხლსასროლი იარაღის უკანონო ტარებას გულისხმობს და ისჯება 7-დან 15 წლამდე ვადით თავისუფლების აღკვეთით.