2015-11-22 21:09

ქუთაისში დაკავებულ შოთა ქემოკლიძეს, რომელიც პოლიციელებმა სცემეს, შემდეგ კი თვითდაზიანებები მიიყენა და საავადმყოფოში გადაიყვანეს, სადაც გამოკვლევაზე უარი უთხრეს, პოლიციის მანქანით ქალაქში დაატარებენ, რადგან წინასწარი დაკავების საკანში არ მიიღეს - სისხლმდინარი დაზიანებების გამო. ამის შესახებ "ქრონიკა+"-ის მთავარი რედაქტორი ელისო კილაძე და დაკავებულის ოჯახის წევრები წერენ.

ელისო კილაძე შს მინისტრს მიმართავს და სთხოვს, რამდენიმე უღირს პოლიციელს უწყების პრესტიჟი არ გადააყოლოს, ხოლო შოთა ქემოკლიძის ძმა - ლევანი წერს:

"ქუთაისში ვინც ხართ ჟურნალისტები,მოიმარჯვეთ კამერები და მიდით ქუთაისის ,,კაპეზეზე'' ნახავთ მანქანაში სისხლიდან როგორ იცლება ადამიანი !!!! შსს - განცხადებით ვითომ და ბრიტვა გადაყლაპა, მათი თქმით ისინი შესაბამის რეაგირებას ახდენენ !!! ამ წუთებში გონება დაკარგა! გვიშველეთ!".

შეგახსენებთ, შს იმერეთის მთავარი სამმართველოს წინასწარი დაკავების საკანში მყოფი შოთა ქემოკლიძე პოლიციელებმა სასტიკად სცემეს, რის შემდეგაც, სავარაუდოდ, დაკავებულმა მძიმე თვითდაზიანება მიიყენა.

სამმართველოში სასწრაფო დახმარების ბრიგადა შეიყვანეს, ქემოკლიძე კლინიკაში გადაიყვანეს, მაგრამ იქ გამოკვლევებზე უარი თქვეს, უკან დაბრუნებული ეჭვმიტანილი კი წინასწარი პატიმრობის საკანში არ მიიღეს, დაზიანებების გამო, რის შემდეგაც ის ისევ პოლიციის "პიკაპში" გადაიყვანეს. ბოლო ინფორმაციით, დაკავებულმა გონება დაკარგა და ისევ კლინიკაში გადაიყვანეს. 

წაიკითხეთ ამავე თემაზე: საკანცელარიო დანის გამო დაკავებული მამაკაცი პოლიციაში სასტიკად სცემეს - ის სასწრაფომ კლინიკაში გადაიყვანა