კომპანია "ალბატროსის" მფლობელს დავით ბეგიაშვილს კუს ტბაზე დღეს დილით კუთვნილი ავტომანქანა დაუდგენელმა პირებმა დაუწვეს, - მომხდარ ფაქტს შსს-ს პრესსამსახურში ადასტურებენ.
შსს-ს ინფორმაციით, გამოძიება დაწყებულია სისხლის სამართლის კოდექსის 187-ე მუხლით, რაც სხვისი ნივთის დაზიანებას ან განადგურებას გულისხმობს.
შეგახსენებთ, დავით ბეგიაშვილი ყოფილი პოლიტდევნილი და ბიზნესმენია. კომპანია "ალბატროსის" შენობა, რომელიც ჭავჭავაძის 44-ში მდებარეობს, ბიზნესმენს 2011 წელს ჩამოართვეს. მის მიმართ სისხლის სამართლებრივი დევნა თაღლითობის, საგადასახადო დავალიანებისა და ქონების ჩამორთმევის მუხლებით იყო აღძრული.
2013 წლის დეკემბერში ბიზნესმენი უზენაესმა სასამართლომ გაამართლა: შემოსავლების სამსახურის მოთხოვნა, რომელიც შპს "ალბატროს პრეზენტს" 3 მილიონი ლარის გადახდას ავალებდა, ბათილად ცნო. ქონების ნაწილს ყადაღა მოეხსნა, ხოლო ბეგიაშვილს შენობა დაუბრუნდა.
