2015-09-24 09:50

თელავში, ბახტრიონის ქუჩაზე, საკუთარ სახლთან მოკლული ყოფილი პოლიციელი ბექა აბულაძე საავადმყოფოში მიყვანამდე გარდაიცვალა - მას კალაშნიკოვის სისტემის ავტომატის რამდენიმე ტყვია ჰქონდა მოხვედრილი. უცნობმა ბექა ა.-ძე ეზოდან გამოსვლისთანავე დაცხრილა და მიიმალა.

მოკლულის მეზობლები ამბობენ, რომ სროლის ხმაზე ქუჩაში გამოვიდნენ და ჭიშკართან მიწაზე დაცემული ბექა ა.-ძე იპოვეს, მანამდე კი ავტომატის ჯერისა და საბურავების ღრჭიალის ხმა გაიგეს, რაც იმას ნიშნავს, რომ თავდამსხმელი მანქანით იყო და ადგილიდან სწრაფად დაძვრის შემდეგ მიიმალა. საბურავების კვალი ასფალტს ეტყობა. 

თვითმხილველთა თქმით, მკვლელი ჩასაფრებული იყო და ყოფილი პოლიციელის შინ დაბრუნებას ელოდებოდა, ან მას უკან მიჰყვებოდა: როცა ბექა ა.-ძე ეზოში შევიდა, ჭიშკართან გაჩერებული მანქანიდან გადმოსულმა პირმა მას დაუძახა. ბექა ა._ზე შემობრუნდა და ჭიშკართან მივიდა, ხოლო ქუჩაში გასვლისთანავე უცნობმა თავდამსხმელმა ავტომატის ჯერი მასზე მიუშვა. 

არ გამორიცხავენ, რომ მკვლელობა ყოფილი პოლიციელის სამსახურებრივ წარსულს უკავშირდება და შურისძიების ნიადაგზეა ჩადენილი, თუმცა, კონკრეტული დეტალები ამ თემაზე არ დასახელებულა. იმის მიუხედავად, რომ მკვლელობის შემდეგ თელავში პოლიციამ გასასვლელები გადაკეტა და პატრულირება დაიწყო, დანაშაულში ეჭვმიტანილის ცხელ კვალზე დევნამ შედეგი ვერ გამოიღო - ამ დრომდე მკვლელობისთვის არავინაა დაკავებული.