თბილისის საქალაქო სასამართლოში პროკურატურა ცდილობდა, გიგი უგულავას გათავისუფლების შესახებ დანიშნული პროცესი გადაედო და მიზეზად სათადარიგო მოსამართლეს ასახელებდა. პროცესს სათადარიგო მოსამართლე წარმართავს, რადგან ძირითადი მოსამართლე საქართველოში არ იმყოფება.
პროკურატურის განცხადებით, სათადარიგო მოსამართლე არაა უფლებამოსილი, პროცესი ჩაატაროს, ხოლო გადაწყვეტილება ვერ იქნება კანონიერი. პროკურატურის წარმომადგენლებმა მოსამართლის აცილების შუამდგომლობა დააყენეს, რომელიც სასამართლომ არ დააკმაყოფილა.
სასამართლო პროცესს ესწრება საქართველოს ყოფილი შსმ მინისტრი ვანო მერაბიშვილიც, რადგან საქმე ეხება ერთ საკითხს, რაშიც უგულავასთან ერთად, მერაბიშვილიც ფიგურირებს. ვანო მერაბიშვილმა უკვე მიმართა პროკურატურას: "მე მინდა მივმართო პროკურატურას: რაც უფრო მალე შეგუებიან იმ ფაქტს, რომ მათ ძალმომრეობას და აღვირახსნილობას დაესვა წერტილი, კარგი იქნება ჩვენი ქვეყნისთივის".
რამდენიმე წუთის წინ მცირე ინციდენტი მოხდა სასამართლოს ეზოში, სადაც გიგი უგულავას მხარდამჭერები იმყოფებიან. "თავისუფალი ზონის" წევრები სოციალურ ქსელში წერენ, რომ სამართალდამცველებმა, კერძოდ, სუსელებმა ეზოში "ტიტუშკები" შემოიყვანეს, ხოლო მცირე ინციდენტის შემდეგ მანქანებით გაიყვანეს ისინი ეზოდან.
სასამართლო პროცესი, სადაც გიგი უგულავას გათავისუფლების შესახებ მსჯელობენ, ამ დრომდე მიმდინარეობს.
