2015-08-29 10:03

ოქროყანაში მომხდარი მკვლელობის საქმე შემდგომი გამოძიებისთვის პროკურატურას გადაეცა. ქ. თბილისის მთავარ სამმართველოში დაიწყო გამოძიება სისხლის სამართლის საქმეზე, განზრახ მკვლელობის და ცეცხლსასროლი იარაღის უკანონოდ შეძენა-შენახვის ფაქტზე, საქართველოს სისხლის სამართლის კოდექსის 108-ე და 236-ე მუხლის მეორე და მესამე ნაწილით გათვალისწინებული დანაშაულის ნიშნებით.

ამასთან, ამ დრომდე არ არსებობს ოფიციალური ვერსია იმის შესახებ, რა მოხდა ოქროყანაში. გავრცელებული ფაქტებისა და დეტალების შეჯერებით არ დასტურდება შეიარაღებული თავდასხმისა და მანქანის დაცხრილვის ფაქტი. სავარაუდოდ, სასიკვდილო გასროლა მანქანაში მოხდა. წინასწარი ინფორმაციით, ლევან გვაზავას ცეცხლსასროლი იარაღი გაუვარდა, რასაც რეზო კალომლეწავი ემსხვერპლა, ამის შემდეგ კი თავად ლევან გვაზავამ თვითმკვლელობა სცადა და მძიმედ დაიჭრა. ის კლინიკაში გადაიყვანეს და სასწრაფო ოპერაცია ჩაუტარეს, თუმცა, მდგომარეობა ამ დრომდე მძიმეა.

მანქანაში იმყოფებოდა კიდევ ორი პირი, რომელთაც გვიან ღამემდე პროკურატურაში ჰკითხავდნენ. მთელი ღამის განმავლობაში შემთხვევის ადგილზე რჩებოდა ცხედარი, რომელსაც ექსპერტიზა ჩაუტარდა, ადგილზე იმყოფებოდნენ შს მინისტრი და მისი მოადგილეები.

"მოგვიანებით საქმე შემდგომი გამოძიებისათვის გადაიგზავნა ქ. თბილისის პროკურატრის საგამოძიებო ნაწილში. შეტყობინების თანახმად, თბილისი-ტაბახმელის ავტომაგისტრალზე ნანახი იქნა სავარაუდოდ ცეცხლსასროლი იარაღიდან გასროლის შედეგად გარდაცვლილი მამაკაცის გვამი, რომელიც ჩატარებული გამოძიების შედეგად აღმოჩნდა რეზო კალომლეწავი.

ასევე დადგინდა, რომ შემთხვევის ადგილიდან ცეცხლნასროლი ჭრილობით ინგოროყვას სახელობის კლინიკაში გადაყვანილ იქნა ლევან გვაზავა. საქმეზე ტარდება გადაუდებელი საგამოძიებო მოქმედებები - მიმდინარეობს შემთხვევის ადგილის დათვალიერება, იკითხებიან მოწმეები, დანიშნულია ყველა შესაბამისი ექსპერტიზა. გამოძიების შედეგების შესახებ საზოგადოებას ეცნობება დამატებით", - აცხადებს პროკურატურის პრესსამსახური. 

"რუსთავი-2"-ის ფოტო შემთხვევის ადგილიდან