2015-05-15 10:38

ზუგდიდის რაიონის სოფელ რუხში შსს-მ ე.წ. კანონიერი ქურდი დააკავა, რომელიც ზუგდიდის რაიონში ოკუპირებული აფხაზეთის ტერიტორიიდან შემოვიდა. "კანონიერი ქურდის" დაკავება ოპერატიული ინფორმაციის საფუძველზე მოხდა. 

შსს-ს ინფორმაციით, დაკავებულია 1972 წელს დაბადებული, წარსულში ყაჩაღობისა და სხვადასხვა მძიმე დანაშაულისთვის ნასამართლევი თემურ გ. 

"გამოძიებამ დაადგინა, რომ თემურ გ. საქართველოში აფხაზეთის ოკუპირებული ტერიტორიდან შემოვიდა. დაკავებულს პირადი ჩხრეკისას ნარკოტიკული საშუალება აღმოაჩნდა. ნარკოლოგიური შემოწმებით მას ოპიუმის ჯგუფის ნარკოტიკის მოხმარების ფაქტი დაუდგინდა. თემურ გ. კანონიერ ქურდობას აღიარებს.

გამოძიება კანონიერი ქურდობის და ნარკოტიკული საშუალების შეძენა-შენახვის ფაქტზე მიმდინარეობს (საქართველოს სსკ-ის 223 პრიმა მუხლის მე-2 ნაწილით და 260-ე მუხლის 1-ლი ნაწილით", - ნათქვამია შსს-ს მიერ გავრცელებულ ინფორმაციაში.