2015-04-30 04:24

უკვე დადგენილი და იდენტიფიცირებულია ბიზნესმენ ბესიკ ხარძიანის მკვლელობაში ეჭვმიტანილის ვინაობა, - განცხადება ოჯახის ადვოკატმა გააკეთა. მალხაზ სალაყაიას თქმით, მკვლელი 40 წლამდე ასაკის მამაკაცია.

ამასთან, ადვოკატმა ვერაფერი თქვა იმის შესახებ, მოასწრო თუ არა მკვლელობაში ეჭვმიტანილმა ქვეყნის დატოვება. მისი თქმით, ცნობილია, რომ მას ქვეყანა საჰაერო გზით არ დაუტოვებია, ხოლო გადაკვეთა თუ არა მან სახმელეთო საზღვარი, ჯერაც დაუდგენელია.

რაც შეეხება ბესიკ ხარძიანის შვილის განცხადებას, რომლის მიხედვითაც ხარძიანის მკვლელობა მისმა მეორე მეუღლემ ეკა ნონიკაშვილმა დაუკვეთა, სალაყაია ამ განცხადებას ემოციურ ფონზე გაკეთებულად მიიჩნევს. სალაყაიას განცხადებით, მკვლელობა ნამდვილად შეკვეთილია.

შეგახსენებთ, ბესო ხარძიანი თბილისში, საკუთარ სახლთან ახლოს, სადარბაზოში, ცეცხლსასროლი იარაღიდან გასროლით 28 მარტს მოკლეს.