2015-04-29 10:23

თბილისსა და გურჯაანში ერთ ღამეში სამი კრიმინალური შემთხვევა მოხდა: თბილისში, მცხეთის ქუჩაზე ახალგაზრდა ცეცხლსასროლი იარარით დაჭრეს, ვარკეთილში მოზარდს გულმკერდში ე.წ. შპიცი ჩაარტყეს და გურჯაანში პოლიციელმა მოქალაქე სცემა.

მცხეთის ქუჩაზე დაჭრილი თემურ ხუბულური ამ დრომდე კლინიკაში რჩება, თუმცა, მის სიცოცხლეს საფრთხე არ ემუქრება: ფეხებში დაჭრილ ხუბულურს უკვე ჩაუტარდა გადაუდებელი ოპერაცია და პოსტოპერაციულ რეჟიმში მკურნალობს.

ამ დრომდე მძიმეა ვარკეთილში გუშინ ღამით დაჭრილი მოზარდის მდგომარეობა: მას ურთიერთშელაპარაკების დროს გულმკერდში ე.წ. შპიცი ჩაარტყეს. მოზარდს ჭრილობა მარჯვენა პარკუჭზე ჰქონდა მიღებული და გადაუდებელი ოპერაცია ჩაუტარდა, რის შემდეგაც ამ დრომდე მართვადი სუნთქვის რეჟიმზე იმყოფება.

გურჯაანში, 9 აპრილის ქუჩაზე ჯერ შელაპარაკება, შემდეგ კი ხელჩართული ჩხუბი მოხდა მოქალაქესა და პოლიციელებს შორის. გურჯაანის პოლიციაში არ უარყოფენ, რომ ერთ-ერთმა თანამშრომელმა მოქალაქე სცემა, თუმცა კობიაშვილს დაუმორჩილებლობაში ადანაშაულებენ. თავის მხრივ, კობიაშვილის ოჯახი პოლიციას ძალადობაში სდებს ბრალს.