2015-02-11 20:37

ქალაქ თბილისის მერიის ზედამხედველობის სამსახურის აპარატის უფროსი 1972 წელს დაბადებული ჯოკია ბოდოკია შინაგან საქმეთა სამინისტროს ანტიკორუფციული სააგენტოს თანამშრომლებმა დააკავეს.

შსს-ს ინფორმაციით, თბილისის მუნიციპალიტეტის მერიის ზედამხედველობის სამსახურის აპარატის უფროსმა ჯოკია ბოდოკიამ ერთ-ერთი კერძო კომპანიის წარმომადგენელს სასტუმროს მშენებლობის ნებართვის გაცემაში დახმარებისა და მშენებლობის პროცესში მფარველობის გაწევის სანაცვლოდ ქრთამის სახით მოსთხოვა სასტუმროს მშენებლობის ღირებულების 10 % – 180 000 აშშ დოლარი, საიდანაც წინასწარ ქრთამის სახით აიღო მოთხოვნილი თანხის ნაწილი – 50 000 აშშ დოლარი.

ჯოკია ბოდოკიას შესახებ მისი დანიშვნისთანავე გავრცელებული ინფორმაციით, ის თბილისის მერის დავით ნარმანიას ნათესავი იყო. მოგვიანებით გავრცელდა ინფორმაცია, რომ ნარმანია და ბოდოკია არა ნათესავები ან თანაკლასელები, არამედ თანასოფლელები იყვნენ: ორივე ზუგდიდის რაიონის სოფელ კოკში დაიბადა და გაიზარდა.

ჯოკია ბოდოკია თანამდებობაზე 2014 წლის ოქტომბერში დაინიშნა. მანამდე, ორი წლის განმავლობაში ბოდოკია „ქართული ოცნების“ წარმომადგენელი იყო. ის თბილისში, ვაკის რაიონში ცხოვრობს.