2015-02-10 20:18

ტრაგიკულად დაღუპული 19 წლის ნანა გიგლემიანის ბებია სამართალდამცავებს საქმის გამოძიებას სთხოვს:„ველოდები ხვალინდელი დღის გათენებას. სამმართველოს უფროსი დაგვპირდა, რომ საქმეს პირად კონტროლზე აიყვანს და ჩემი შვილიშვილის მკვლელი დაისჯება.

"ვიღაცამ გასისხლიანებული შვილიშვილი მიმიტოვა და გაქიცა, გაჩერებულიყო, იქნებ გადაერჩინა, მისულიყო ჩემს ერთადერთთან და რაიმეში დახმარებოდა. ერთადერთი შვილიშვილი მომიკლა, რა ჭკუაზე უნდა ვიყოთ.

ყველანაირი კვალი წაიშალა, უცებ გადარეცხეს ყველაფერი, ამბობენ, კამერები გათიშული იყოო-ასე ყველაფერი ერთად როგორ მოხდა,“-აცხადებს ნაირა ნანავა.

შეგახსენებთ, რომ 20 წლის ნანა გიგლემიანი ქუთაისში, აღმაშენებლის ქუჩაზე ტაძრიდან სახლში ბრუნდებოდა, რა დროსაც მას მაღალი სიჩქარით მოძრავი ავტომანქანა დაეჯახა.

“არსებობენ თვითმხილველები, რომელთაც დაინახეს ვინც ნანას დაეჯახა. მათი თქმით, ის ქალია და ჯიპით მოძრაობდა. რეალური მკვლელი შემთხვევის ადგილიდან მიიმალა. როგორც გაირკვა მას პოლიციელი ყავს ნათესავი და ამის გამო ხელს აფარებენ და დანაშაულს სხვას აბრალებენ”, - ამბობენ ოჯახის წევრები. მათი თქმით, ავარიაში დამნაშავე მძღოლი ქალის ნაცვლად ბიჭი ჰყავთ დაკავებული.