2015-02-08 20:23

„ჩემი დაცვის ქვეშ მყოფმა 19 იანვარს, დღესასწაულის მილოცვის მიზნით, სხვა ნაცნობებთან ერთად ირაკლი ფირცხალავასაც დაურეკა, მაგრამ მან იმ დღეს არ უპასუხა და მხოლოდ მეორე დღეს შეეხმიანა“, - ამის შესახებ დაკავებული გიორგი სოსანაშვილის ადვოკატმა სოსო ჯოგლიძემ „იმედის კვირაში“ განაცხადა.

ადვოკატის განცხადებით, ის საქმის მასალებს არ გაცნობია, მაგრამ შეხვდა მისი დაცვის ქვეშ მყოფს და მისი სიტყვებიდან იცის, რომ მან ირაკლი ფირცხალავას დაურეკა.

შეკითხვაზე, იყვნენ თუ არა სოსანაშვილი და ფირცხალავა ახლო მეგობრები, ადვოკატმა განაცხადა, რომ ისინი მეგობრები არ ყოფილან, მაგრამ ერთმანეთს იცნობდნენ, როგორც შსს-ს ძველი თანამშრომლები:

„ირაკლი ფირცხალავას გარდა, მან რამდენიმე სხვა ადამიანსაც დაურეკა და ნათლისღება მიულოცა, თუმცა ფირცხალავამ მას იმ დღეს არ უპასუხა, მეორე დღეს დაურეკა და მოიკითხა, ვინ ესაუბრებოდა. ჩემი დაცვის ქვეშ მყოფმა მას უთხრა, ვინც იყო, აუხსნა, რომ მისალოცად დაურეკა და საპასუხოდ მილოცვაც მიიღო“, - განაცხადა სოსო ჯოგლიძემ.