ახალი გარემოებები ხდება ცნობილი 2 თებერვალს აბაშაში მომხდარ ფაქტთან დაკავშირებით, რა დროსაც საცხოვრებელი სახლი და ბოსელი დაიწვა, მოგვიანებით კი დამწვარ სახლში 52 წლის მამაკაცის ცხედარი აღმოაჩინეს. როგორც გაირკვა, მამაკაცი ჯერ მოკლეს, შემდეგ კი სახლი და ბოსელი კვალის დაფარვის მიზნით გადაწვეს.
ოფიციალური ინფორმაციის მიხედვით, დაკავებულია აბაშაში მცხოვრები გიორგი ს., რომელმაც ტოტია მესხია ჯერ მოკლა, შემდეგ კი სახლი გადაწვა და მესხიას კუთვნილი 30 სული საქონელი ფერმიდან წაიყვანა. დაკავებული მოკლულის თანაშემწე იყო.
შსს-ს მიერ დაკავებულ გიორგი ს.-ს ბრალი განზრახ მკვლელობის, ქურდობისა და სხვისი ნივთის დაზიანების მუხლით წარედგინა. დაკავებული დანაშაულს აღიარებს.
"გამოძიებამ დაადგინა, რომ ბრალდებულმა ურთიერთშელაპარაკების ნიადაგზე სანადირო თოფიდან ერთი გასროლით სასიკვდილოდ დაჭრა აბაშის რაიონის სოფელ ანჯელში მცხოვრები, 1964 წელს დაბადებული ტოტია მ, შემდგომ დანაშაულის დაფარვის მიზნით ცხედარი დაწვა, მსხვერპლის კუთვნილ 17 სულ მსხვილფეხა რქოსან პირუტყვს მართლსაწინააღმდეგოდ დაეუფლა და შემთხვევის ადგილიდან მიიმალა", - ნათქვამია შსს-ს მიერ გავრცელებულ ინფორმაციაში.
