2015-01-27 23:34

„რუსთავი-2“-ის გადაცემა „არჩევანში“კრიმინიალური პოლიციის  ხელმძღვანელის ყოფილმა მოადგილემ,  ირაკლი ფირცხალავამ აღნიშნა, რომ მას დააპატიმრებენ.

მისივე თქმით, სახალხო დამცველის განცხადება იმის შესახებ, რომ ია მეტრეველზე მისი მხრიდან იგეგმებოდა თავდასხმა, არის პოლიტიკური, რადგან სახალხო დამცველი ანალოგიური შინაარსის განცხადებებთან დაკავშირებით ერთი წლის წინ იყო ინფორმირებული.

„ხორციელდება ზეწოლა. ამ წნეხის პირობებში კი მეც და ჩემი მეგობრებიც ვფიქრობთ, რომ აუცილებლად დაგვაკავებენ.

თუმცა, გაქცევას და დამალვას არ ვაპირებთ. არც მოწმეებზე ზეწოლას არ ვახდენთ.ეს არის ერთი წლისწინანდელი ამბავი.

მაშინ ვაზაგაშვილების ადვოკატებმა თქვეს იგივე, შემდეგ ქალბატონი ია მეტრეველი საუბრობდა ამაზე.

მინდა, ვთქვა, რომ ამ თემასთან დაკავშირებით მე გასული წლის 27 იანვარს მივმართე შსს-ს, გამოეძიებინა ეს ფაქტი.

დამიბარეს, დამკითხეს, საბოლოოდ კი მითხრეს, რომ ამ საქმის გამოძიება მათ კომპეტენციაში არ შედიოდა, რადგან საქმეში პატიმარი ფიგურირებდა," - განაცხადა ფირცხალავამ.