2014-12-22 09:01

სამხედრო ნაწილში ცეცხლსასროლი იარაღიდან თავში მიყენებული ჭრილობით გარდაცვლილი 20 წლის წვევამდელი ათმეთაურმა იპოვა. განცხადებას თავდაცვის სამინისტრო ავრცელებს.

როგორც განცხადებიდან ირკვევა, 1994 წელს დაბადებული ნიკოლოზ უგულავა საქართველოს შეიარაღებულ ძალებში 2014 წლის 4 ოქტომბრიდან ირიცხებოდა.

იგი საქართველოს შეიარაღებული ძალების სპეციალური ოპერაციების ძალების მხარდამჭერი ბატალიონის დაცვის ასეულში სავალდებულო სამხედრო სამსახურს იხდიდა.

მომხდარზე საქმე სისხლის სამართლის კოდექსის 115-ე მუხლით აღიძრა, რაც თვითმკვლელობამდე მიყვანას გულისხმობს. გამოძიებას საქართველოს შეიარაღებული ძალების სამხედრო პოლიციის დეპარტამენტის საგამოძიებო სამმართველო, მთავარი პროკურატურის ზედამხედველობით, აწარმოებს.

განცხადებაში ნათქვამია, რომ წვევამდელის დაკრძალვის ხარჯებს სამინისტრო სრულად აანაზღაურებს.