2015-02-22 00:24

საპარლამენტო უმცირესობის ლიდერმა დავით ბაქრაძემ შეშფოთება გამოთქვა ლარის კურსის გაუფასურებასთან დაკავშირებით  და მთავრობას მოქმედების კონკრეტული გეგმა შესთავაზა.

„ძალიან შეშფოთებულიო ვარ არა მხოლოდ იმით, რომ ფიზიკურად ლარის კურსი ყოველდღიურად ზევით იწევს და ეს ნიშნავს დაკლებულ ხელფასებს, დაკლებულ პენსიებს, გაძვირებულ კრედიტებს, გაძვირებულ ცხოვრებას.

ეს არის ერთი, ძალიან საშიში და ცუდი მხარე ამ პროცესის. მაგრამ მეორე ცუდი მხარე გახლავთ ის დამოკიდებულება, რომელსაც მთავრობა ამჟღავნებს ამ პროცესის მიმართ. ჩვენ ვხედავთ, რომ მთავრობა ყველგან ეძებს დამნაშავეს, გარდა საკუთარი მუშაობისა.

ცდილობს ყველაფერი უცხოეთში მიმდინარე პროცესებს გადააბრალოს. ჩვენ ვხედავთ პარლამენტს, სადაც დღეს ვიმსჯელეთ უამრავ საკითხზე, მაგრამ არ გვიმსჯელია მთავარზე, რაც აწუხებს ჩვენს მოსახლეობას. ეს არის ის თემა, სადაც მე არასდროს და ჩვენ ჩვენი გუნდი არასდროს არ ვისაუბრებთ ნიშნის მოგებით, იმიტომ, რომ არ შეიძლება ნიშნის მოგებით ისაუბრო შენი ხალხის გაჭირვებაზე.

ეს არის ის თემა სადაც ჩვენ ხელისუფლებას ვთავაზობთ გეგმას, იმ გეგმას, რომელიც დღეს მთავრობას არა აქვს საკუთარი არაკომპეტენტურობის გამო. ჩვენ ვთავაზობთ კონკრეტულ გეგმას, რა ნაბიჯები უნდა გადადგას საქართველომ ამისთვის.

მე მოვუწოდებ საქართველოს საპარლამენტო უმრავლესობას, ხვალ ქუთაისში გვაქვს პარლამენტის პლენარული სხოდმა. მე მზად ვარ ნებისმიერ წუთს, ხვალ, უმრავლესობის თანხმობის შემთხვევაში, ერთად დავსხდეთ და ერთად გავიაროთ ეს გეგმა.

როგორც პასუხისმგებლობის გრძნობის მქონე დეპუტატებმა ,ვისაუბროთ არა აბსტრაქციულ თემებსა და ფეხბურთის თამაშზე, არამედ ვისაუბროთ იმაზე, თუ რა გავუკეთოთ ჩვენს მოსახლეობას. ნებისმიერ წუთში თუკი უმრავლესობა იქნება თანახმა, მზად ვართ დავსხდეთ ყოველგვარი პარტიულობის დავიწყებით და ვისაუბროთ ამ გეგმაზე.

დღეს მთავარია ის, თუ რა ხდება ჩვენს ეკონომიკაში, იმიტომ, რომ თუ ლარი ჩამოგვეშალა, გვერდზე დაგვრჩება პარტიაც, „ოცნებაც“ და დავბრუნდებით 90-იან წლებს. ვწუხვარ, რომ ხელისუფლებას არ შეუძლია და არ უნდა ეს რეალობა ბოლომდე გაიაზროს."- განაცხადა ბაქრაძემ.