2015-02-08 02:35

საეჭვო ტენდერები და პარტიული შემოწირულობები – ჟურნალ ”ფორბსის” ქართულ გამოცემაში შესაძლო ელიტურ კორუფციაზეა საუბარი. "გასაოცარი დემოკრატია ფულის ტყვეობაში", - სტატია ასეთი სათაურით  "ფორბსის" ქართული გამოცემის თებერვლის ნომერში დაიბეჭდა.

სტატიაში საუბარია საეჭვო ტენდერების და პარტიული შემოწირულობების სქემაზე, რომელიც ავტორის და ექსპერტების შეფასებით, ელიტური კორუფციის ნიშნებს შეიცავს.

"ფორბსის" ქართული გამოცემის მთავარი რედაქტორის, გუგა სულხანიშვილის, სტატიაში ნათქვამია, რომ ტენდერებში გამარჯვებული კომპანიები და ასევე ყოფილ პრემიერთან დაკავშირებული კომპანიების თანამშრომლები მიღებული თანხის ნაწილს ”ქართულ ოცნებას” ურიცხავენ.

სტატიის ავტორი მიიჩნევს, რომ საქართველოში ოლიგარქიული სტილის მმართველობა დამკვიდრდა.

სტატიის ავტორი ყურადღებას ამახვილებს იმაზეც, რომ 2014 წლის აპრილში "ქართულ ოცნებას" ნახევარ მილიონ ლარზე მეტი „ქართუ ბანკის“, „ქართუ მშენებელის“ და სხვა "ქართუ" კომპანიების 30–ზე მეტი თანამშრომლისგან აქვს მიღებული.

ქვეყანაში კორუფციის დონის მატებაზე საუბრობენ ეკონომიკური სფეროს ექსპერტებიც.

ელიტური კორუფციის ბრალდება ყოფილი ხელისუფლების მისამართით ხშირად ისმოდა. თუმცა, „ნაციონალურ მოძრაობაში“ ამბობენ, რომ ასეთი ბრალდების ოფიციალურად ვერც წაყენება და ვერც დამტკიცება ახალმა ხელისუფლებამ ვერ შეძლო.

"ქართული ოცნების" ხელისუფლების წინააღმდეგ კი საპარლამენტო ოპოზიცია კორუფციული სქემის კონკრეტულ მაგალითებს და სფეროებს ასახელებს. მათ შორის ლარის კურსის ცვალებადობაა, რომელიც, შესაძლოა, კონკრეტული პირების ფინანსურ ინტერესებს ემსახურებოდეს.

ოპოზიციის წევრები ზვიად ჯანყარაშვილის სახელთან დაკავშირებულ სკანდალურ ტენდერებს და სხვა სფეროებს იხსენებენ, რომელზეც გავლენების მოპოვებაც მმართველი გუნდის წევრებს დაუკავშირდა.

"ქართული ოცნების" წარმომადგენლები პარტიის ფინანსურ საქმიანობასთან დაკავშირებით ოფიციალურ კომენტარს არ აკეთებენ. პარლამენტის ვიცესპიკერი, მანანა კობახიძე, კი კორუფციის ნიშნებს ხელისუფლების საქმიანობაში ვერ ხედავს.

"რუსთავი-2"