2014-12-06 00:34

ვანო ჯავახიშვილმა 6 დეკემბრის გადაცემის მონოლოგში ლარის კურსზე, უკრაინაში წინა ხელისუფლების წარმომადგენელთა დანიშვნაზე და ბიძინა ივანიშვილის კომენტარებზე იხუმრა.

"ლარი ნაციონალების დროს 3-ზე, 4-ზე და 5-ზეც კი ადიოდა, ოღონდ არ აშუქებდნენ და არავის რომ არ გაეგო, პური ისევ 70 თეთრი ღირდა";

"ბიძინა ივანიშვილმა თქვა, ლარი მერყეობსო. ბატონო ბიძინა, "მერყეობს" ნიშნავს, როცა ადის და ჩამოდის, ეს ლარი კიდევ სულ ეცემა და ეცემა. ანუ, კი არ მერყეობს, რყეობს. ესე იგი, ან დოლარი მართლა მყარდება, ან მთავრობა რყეობს";

"...ეს უკრაინის მთავრობა სულ გათავხედდა. საერთოდ არ ეშინია ბიძინა ივანიშვილის, რა წესია ეს? აი, ნინო ბურჯანაძემ თქვა, ჩვენ დიპლომატიური ურთიერთობა უკრაინასთან საერთოდ უნდა გავწყვიტოთო. დაფიქრდები და, სწორია ეს ქალი... რად გვინდა ჩვენ ამ უკრაინასთან ურთიერთობა, როცა მას ჩვენთვის ერთი გოჯი მიწაც კი არა აქვს წართმეული...";

"ბიძინა ივანიშვილი მაშინ ჩნდება ეკრანზე, როცა რაღაც ცუდადაა. როცა ხალხს სტკივა, გამოვა და იტყვის ორ სიტყვას და ტკივილი გიქრება. ანუ, რაღაც, ხალხის ტკივილგამაყუჩებელივითაა. მაგრამ ტკივილგამაყუჩებელმა მიჩვევა იცის და როცა ეჩვევი, აღარ მოქმედებს, ვერ გიყუჩებს ტკივილს. ამიტომ უნდა შეცვალო...".