ირაკლი ბათიაშვილი „რეზონანსთან“ საუბრისას აცხადებს, რომ ბიძინა ივანიშვილის მიერ გიორგი მარგველაშვილის არჩევა პრეზიდენტად შეცდომა იყო, რადგან ამის გარეშე მარგველაშვილს პრეზიდენტობაზე პრეტენზია არ ექნებოდა, ახლა კი დაიჯერა, „რომ ის ქვეყნის პრეზიდენტია“.
ირაკლი ბათიაშვილის თქმით, ივანიშვილის გარეშე ვერც ღარიბაშვილი გახდებოდა პრემიერმინისტრი და ზოგადად, ერთი კაცის ავტორიტეტმა მოიტანა ის, რომ ავტორიტარული საქართველო ოლიგარქიულმა საქართველომ ჩაანაცვლა.
"ბიძინა ივანიშვილის მიერ გიორგი მარგველაშვილის პრეზიდენტად არჩევა იყო დიდი შეცდომა. ჩვენ ხომ არგად ვიცით, რომ მარგველაშვილს სურვილიც კი არ გაუჩნდებოდა, რომ ის იქნებოდა საქართველოს პრეზიდენტი. დღეს მან უკვე დაიჯერა, რომ ის ქვეყნის პრეზიდენტია. მთელი საარჩევნო კამპანიის განმავლობაში ივანიშვილი მას დაატარებდა როგორც პატარა ბავშვს და იძახდა რომ მას უნდა მისცეთ ხმა. ანუ ფაქტობრივად ამბობდა, რომ თუ მას მისცემთ ხმას, ეს ნიშნავს, რომ მე ამირჩევთო. ასეთი რამ მსოფლიოს არ ახსოვს.
ივანიშვილის გარეშე ვერც ღარიბაშვილი ვერ გახდებოდა პრემიერი, თუმცა ის არჩეული არაა. ის მმართველი გუნდის რჩეული გახდა, ივანიშვილმა გახადა ღარიბაშვილი პრემიერი. ერთი კაცის ავტორიტეტმა მოიტანა ის, რომ მოიტანა ოლიგარქიული მართვის ტიპიური მოდელი. ანუ ავტორიტარული საქართველო შეიცვალა ოლიგარქიული საქართველოთი“, - ამბობს ირაკლი ბათიაშვილი.
