2015-05-21 08:50

ალექსანდრე ალექსანდროვი და ევგენი ეროფეევი ლუგანსკის ოლქში ტყვედ ქართულმა სპეცრაზმმა აიყვანა, - ამის შესახებ თვითგამოცხადებული „დონეცკის სახალხო რესპუბლიკის“ ე.წ. თავდაცვის სამინისტროს წარმომადგენელმა ედუარდ ბასურინმა 20 მაისს განაცხადა. 

„ჩვენი დაზვერვის ზუსტი მონაცემებით იმ დღეს მითითებულ რაიონში საქართველოს შეიარაღებული ძალების სპეცდანიშნულების რაზმი მოქმედებდა“, - განაცხადა ბასურინმა. მისივე თქმით, ქართული სპეცრაზმის საბაზისო ბანაკი სევეროდონეცკში მდებარეობს, უკრაინის შეიარაღებული ძალების სასწავლო ცენტრის საფარქვეშ.

„სხვათა შორის, იქ ჟურნალისტებთან ერთად ხშირად ჩასვლის მოყვარული გახლავთ მიხეილ სააკაშვილი“, - დაამატა მან.

შეგახსენებთ, ორმა ტყვედ ჩავარდნილმა რუსმა სამხედრო მოსამსახურემ განაცხადეს, რომ ისინი რუსეთის ГРУ-ს მესამე სპეცდანიშნულების ბრიგადაში მსახურობენ, რომელიც ტოლიატიშია ბაზირებული, თუმცა, რუსეთის თავდაცვის სამინისტრომ ოფიციალურად განაცხადა, რომ ტყვედ ჩავარდნილები არ არიან მოქმედი სამხედრო მოსამსახურეები. უკრაინულმა მხარემ ორივე ტყვედ აყვანილს ტერორიზმში წაუყენა ბრალი.