2013-11-28 17:52

გამოცემა „რეპორტიორი.ჯი“ აქვეყნებს გაზეთ „საკვირაოს“ სტატიას, სადაც აღწერილია, რომ პრეზიდენტის ინაუგურაციის პარალელურად ქსნის ციხეში კიდევ ერთი „ნათლობა“ შედგა და პატიმარი „სკაიპის“ საშუალებით ე.წ. კანონიერ ქურდად მოინათლა.

წყაროს ცნობით, სასჯელაღსრულების დაწესებულებაში რამდენიმე დღის წინ დაწყებული საკადრო წმენდა, შესაძლოა, სწორედ ამ ფაქტს უკავშირდებოდეს. ჟურნალისტი ნინო დარბაიძე საკუთარ წყაროზე დაყრდნობით აღწერს სიტუაციას, რომელიც ქსნის ციხეში იყო შექმნილი:

„ქსნის მე-15 სასჯელაღსრულების დაწესებულებაში მსჯავრდებული გ.კ. „კანონიერ ქურდად" მონათლეს და ეს ყველაფერი სკაიპის საშუალებით მოხდა“,-წერს ავტორი.

„ციხეში პატიმრის ქურდად მონათვლა, თანაც, უცხოეთიდან და სკაიპის მეშვეობით, მართლაც შემაშფოთებელი ამბავია და ეს ნიშნავს, რომ სასჯელაღსრულების სისტემაში ყველაფერი რიგზე არ არის. წარმოგიდგენიათ, როგორ შეიძლებოდა მომხდარიყო პატიმრის ქურდად მონათვლა, სკაიპის მეშვეობით? პატიმარს საკანში უნდა ჰქონოდა კომპიუტერი (ლეპტოპი) ან მაღალი დონის მობილური ტელეფონი.

ციხის ტერიტორიაზე უნდა მოეხერხებინა ინტერნეტის სიგნალის დაჭერა და ამ გზით უნდა დაკავშირებოდა საზღვარგარეთ მყოფ ე. წ. კანონიერ ქურდებს. უნდა შემდგარიყო ე. წ. სკაიპ-კონფერენცია და წარმართულიყო „ქურდად მონათვლის" პროცედურა, რომელსაც საკმაო დრო დასჭირდებოდა, სავარაუდოდ, ერთი საათი მაინც.

ჩვენი წყარო იმასაც ამბობს, რომ პატიმრის ქურდად მონათვლა შედგა პროექტორის გამოყენებით, ანუ ციხის საკნის კედელი ასრულებდა დიდი ეკრანის ფუნქციას, რომელზეც სპეციალური აპარატურის საშუალებით ვიდეოგამოსახულება მიიღება. როცა ციხეში ხერხდება ლეპტოპის, ან თუნდაც მობილური ტელეფონის და, მით უმეტეს, პროექტორის შეტანა, შემდეგში კი ეს ყველაფერი პატიმრის ქურდად მოსანათლად არის გამოყენებული, რა თქმა უნდა, სისტემის ფაქტობრივი კრახია,“- ნათქვამია სტატიაში.

გამოცემის ინფორმაციით, ქსნის კოლონიაში პატიმარ გ.კ.-ს ქურდად მონათვლა სასჯელაღსრულების სისტემის ხელმძღვანელთა ნებართვითა და ხელშეწყობით მოხდა. წყარო ამბობს, რომ მინისტრი სუბარი და გენინსპექციის უფროსი სუბელიანი ე. წ. კანონიერ ქურდებთან ვალში არიან, რადგან ციხეში არსებული პრობლემები სწორედ ე.წ. ავტორიტეტებმა მოაგვარეს.

სასჯელაღსრულების სამინისტროს პრესსამსახურში სტატიას სერიოზულად არ აღიქვამენ და აცხადებენ, რომ „ამ თემაზე არანაირი კომენტარი არ გაკეთდება“.