2014-07-14 19:54

„ცეკვავენ ვარსკვლავების“ მეოთხე სეზონის გამარჯვებულს, ადვოკატ მარიამ კუბლაშვილს სცენის შემდეგ ადვოკატად დაბრუნება უჭირს, რადგან პროექტმა მისი ცხოვრება უკეთესობისკენ შეცვალა და ბედნიერებას აზიარა.

„ახმეტაში კარგი კლუბი გვქონდა, იქ გამოვდიოდი სილამაზის კონკურსებზე – 10-11 წლისა „მის ახმეტა“ გავხდი. მახსოვს, როგორ ამყვა სცენა, როგორ მესროდნენ ყვავილებს, მანებივრებდნენ აპლოდისმენტებით...

მას შემდეგ ჩემს ცხოვრებაში სცენასთან დაკავშირებით საუბარიც აღარ ყოფილა – გოგო ხარ, ხალხი რას იტყვის, სერიოზული პროფესია უნდა აირჩიოო. მეც ავირჩიე პროფესია, რომლის წყალობითაც სულ სხვა სამყაროში მოვხვდი.

ძალიან მიყვარს ჩემი საქმე, რომ გამაღვიძონ და მთხოვონ, სასწრაფოდ იურიდიული კონსულტაცია გვჭირდებაო, უცებ, წამებში ვბრუნდები ჩემს საქმეში. ახლა ცოტა უფრო რთული იქნება ჩემი დაბრუნება ამ საქმეში, რადგან დავინახე ის, რისი დანახვაც არ მინდოდა.

უცხოებისგან ვიგრძენი თანადგომა, სითბო, რასაც ვერ ვიტყვი ჩემს კოლეგებზე. სავსე ვარ დადებითი ემოციებით, ჩემი ცხოვრება შეიცვალა უკეთესობისკენ. როცა შენ ბედნიერი ხარ, ამას აფრქვევ კიდეც.

ადვოკატური საქმიანობის პარალელურად, რამდენიმე თვეა ბიზნესში ვარ ჩართული. ჩემი პროფესიული საქმიანობიდან გამომდინარე, ხშირად მიწევს უცხოეთში ყოფნა. ისრაელში გავიცანი ადამიანი, ქველმოქმედი ებრაელი, რომელმაც შემომთავაზა, რომ ჩადებდა ინვესტიციას საქართველოში, დაახლოებით 300 000 დოლარს.

ის ვერავის ანდობდა ფულს, მაგრამ მას შემდეგ, რაც მე ახლოს გამიცნო,  გადაწყვიტა, საქართველოში განეხორციელებინა ინვესტიცია. ბიზნესის წარმატების შემთხვევაში კი, 15%-ის მფლობელი მე გავხდებოდი“, - განაცხადა მარიამ კუბლაშვილმა.

„თბილისელები“