ასტროლოგი მიხეილ ცაგარელი აცხადებს, რომ ასტროლოგიური თვალსაზრისით 25 ივლისამდე პერიოდი საზოგადოების თითქმის ყველა წევრისთვის წარმატების მომტანია.
„კარგი პერიოდია მატერიალური ბაზის გასამყარებლად, შემოსავლების დამატებითი წყაროების ან, ახალი სამუშაოს საძიებლად. ეს პერიოდი ხელს უწყობს ბიზნესის გაფართოებას. ივლისის მეორე ნახევარი ასევე კარგია ქორწინების, ბავშვის ჩასახვა-გაჩენისა და შემოქმედებითი უნარების გამოვლენისათვის.
ივლისის მეორე ნახევრიდან 25 ივლისამდე სასურველი დროა, არამარტო ბიზნესში, არამედ პირად ცხოვრებასა და ურთიერთობებში ყველა მნიშვნელოვანი საქმე და ჩანაფიქრი განხორციელდეს“, – აღნიშნავს ცაგარელი.
მისივე თქმით, 25 ივლისიდან ასტროლოგიური თვალსაზრისით სიტუაცია თანდათან გაუარესდება, რასაც მოჰყვება სხვადასხვა ნეგატიური პროცესები და საყოფაცხოვრებო უსიამოვნებები.
„25 ივლისიდან სიტუაცია თანდათან გაუარესებას დაიწყებს, რასაც მოჰყვება მკვეთრი გამონათქვამები საზოგადოებაში, დაუფიქრებელი მოქმედება ადამიანებში, დაპირისპირებები, კონფლიქტები და უსმიამოვნებები გამწვავდება. გაიზრდება ავარიები და სხვადასხვა საყოფაცხოვრებო უსიამოვნებების ალბათობა.
27 ივლისის ახალმთვარეობა მოითხოვს საზოგადოების მხრიდან ყურადღების გაძლიერებას, რადგან ტრავმულობის, ავარიულობის, კონფლიქტურობის და უსიამოვნებების ტენდენციები მოიმატებს. არასტაბილურობის ტენდენცია მატულობს როგორც პოლიტიკურ, ისე ეკონომიკურ სფეროში.
მოსალოდნელია საბუთებში შეცდომების დაშვების შესაძლებლობა. გაუთვალისწინებელი გარემოებები შეიძლება გახდეს კონფლიქტების მიზეზი. ეს რთული პერიოდი 7-8 აგვისტომდე გასტანს, – აცხადებს მიხეილ ცაგარელი.
http://kvira.ge/?p=66711