-
2014-05-17 13:47
საქართველოს მთავრობის განცხადებაში ნათქვამია, რომ არ დასტურდება ინფორმაცია დარიალის ხეობაში მეწყრის ჩამოწოლის შედეგად მოსახლეობაში მსხვერპლის შესახებ. განცხადებაში ასევე აღნიშნულია, რომ სამაშველო ბრიგადები ყაზბეგის რაიონში თბილისიდანაც გაიგზავნა.
"დარიალის ხეობაში მთის მასა მოწყდა. შემთხვევის ადგილზე მობილიზებული არიან სამაშველო სამსახური, საპატრულო პოლიციისა და სამედიცინო დახმარების ბრიგადები. სამაშველო ბრიგადები გაემგზავრა თბილისიდანაც.
შემთხვევა დარიალის ხეობაში ცოტა ხნის წინ მოხდა. მთის მასა საქართველო-რუსეთის საზღვართან ახლოს, მშენებარე ჰესის მიმდებარე ტერიტორიაზე მოწყდა.
ინფორმაცია მსხვერპლის შესახებ, ჯერ დადასტურებული არ არის", - ნათქვამია მთავრობის განცხადებაში.
შეგახსენებთ, რომ საავტომობილო გზების დეპარტამენტის ინფორმაციით, მცხეთა-სტეფანწმინდა-ლარსის საავტომობილო გზის 134-ე კილომეტრზე (ლარსის ხეობა) დევდორკის ხევიდან მოვარდნილი დიდი მოცულობის ღვარცოფის გამონატანების შედეგად, გადაიკეტა მდინარე თერგი და გზის სავალი ნაწილი.
აღნიშნულ მონაკვეთზე აკრძალულია ყველა სახის ავტოტრანსპორტის მოძრაობა. დარიალის ხეობაში დღეს მთა მოწყდა, რამაც მდინარე თერგის დაგუბება გამოიწვია. ხეობაში მოსახლეობის ევაკუაცია მიმდინარეობს.