2017-09-13 10:46

10 სექტემბერს ყოფილი მირტოპოლიტი სერაფიმე(ჯოჯუა) მოსკოვის ოლქში ხოტკოვოში ღვთისმშობლის კვართის სახელობის დედათა მონასტერში რუსეთის პატრიარქ კირილთან ერთად წირავდა.

წირვის ამსახველი ფოტო და ვიდეომასალა რუსეთის საპატრიარქოს ვებგვერდზეა განთავსებული. სერაფიმე ჯოჯუა ბორჯომისა და ბაკურიანის ყოფილი მიტროპოლიტია.

10 სექტემბერს დედათა მონასტერმა სამონასტრო ცხოვრების აღდგენის 25 წლისთავი აღნიშნა. საზეიმო წირვა მოსკოვისა და სრულიად რუსეთის პატრიარქმა კირილმა აღავლინა.

მეუფე სერაფიმემ ეპარქიის მმართველობა ისე დატოვა, რომ განმარტება, თუ რა გახდა ეპარქიიდან წასვლის მიზეზი, არ გაუკეთებია. საპატრიარქოს მხრიდან ერთადერთი განცხადება 2016 წლის 14 აპრილს, ბორჯომში, ახალციხისა და ტაო-კლარჯეთის მიტროპოლიტმა თეოდორე ჭუაძემ გააკეთა, ხოლო მიტროპოლიტმა თეოდორემ მიტროპოლიტ სერაფიმეს გადაწყვეტილება ღვთის ნებით ახსნა და მრევლს მოუწოდა ეპარქიის მმართველის მიერ კათედრის დატოვების მიზეზი არ გამოიძიონ.

"ნუ დაიწყებთ იმის ჩიჩქვნას და გამოძიებას, თუ რამ გამოიწვია ეს. ღვთის განგებაში ჩვენ ვერ ჩავწვდებით. მაგრამ ხვალ, ზეგ , მაზეგ მიზეზები თავისთავად გაცხადდება. მეუფე სერაფიმეს ღმერთი ეპარქიისთვის გაკეთებულ საქმეებს აუცილებლად დაუფასებს და ჩვენც პირველ რიგში, მას ღვაწლი უნდა დავუფასოთ. არ შეიძლება, ადამიანი ღვთის ნების წინააღმდეგ იყოს მებრძოლი, ამიტომ უნდა გადავიტანოთ ეს განსაცდელი", - განაცხადა მიტროპოლიტმა თეოდორემ.

სერაფიმე ჯოჯუა ეპარქიას 21 წლის მანძილზე მართავდა, მისი მოულოდნელი წასვლის შემდეგ გავრცელდა ინფორმაცია, რომ ის ათონის მთაზე იმყოფებოდა, მაშინვე გავრცელდა ინფორმაცია, რომ მას მღვდელმსახურება შეუჩერდა, თუმცა რუსეთის საპატრიარქოს ოფიციალურ ვებ-გვერდზე მას საქართველოს მართლმადიდებლური ეკლესიის მღვდელმთავრად მოიხსენიებენ.

არაოფიციალური ინფორმაციით, რომელზეც კომენტარი საპატრიარქოში ამ დრომდე არ კეთდება, მეუფე სერაფიმეს თანამდებობიდან წასვლის მიზეზი ბორჯომში მცხოვრები ერთ-ერთი ოჯახის სკანდალური პრეტენზია იყო: ოჯახი მღვდელმთავარს არასრულწლოვან გოგონასთან სექსუალური კავშირის დამყარების მცდელობაში ადანაშაულებდა.