2017-08-28 12:38

რუსეთის საგარეო საქმეთა სამინისტროს წარმომადგენელი მარია ზახაროვა "კურიერთან" ექსკლუზიურ ინტერვიუში ადასტურებს, რომ ბორჯომის ხეობაში ხანძრის ჩასაქრობად დახმარების თხოვნა რუსეთმა საქართველოსგან ოფიციალურად, 23 აგვისტოს მიიღო. 

ზახაროვას განმარტებით, ეს შვეიცარიის სამაშველო სამუშაოებში ჩართვის თხოვნა მოსკოვში შვეიცარული დიპლომატიური ხაზის გავლით მიიღეს, რომელიც 2008 წლის შემდეგ ორ ქვეყნის დიპლომატებს შორის კომუნიკაციას ემსახურება.

„23 აგვისტოს თბილისისგან მივიღეთ თხოვნა, რომ დავხმარებოდით ბორჯომ-ხარაგაულის ეროვნულ პარკში ხანძრის ჩაქრობაში. შეტყობინება გაფორმებული იყო ნოტით რუსეთში შვეიცარიის საელჩოში არსებული საქართველოს ინტერესების სექციიდან.

რუსულმა მხარემ ამ თხოვნაზე დაუყოვნებლივ მოახდინა რეაგირება და გამოყო რუსეთის საგანგებო სიტუაციების სამსახურის თვითმფრინავი “ილ 76”, თუმცა შემდგომ ქართულმა მხარემ მადლობა გადაგვიხადა და შეგვატყობინა, რომ ხანძრის კერები ლოკალიზებულია და რუსული მხარის დახმარების საჭიროება აღარ იყო.

შესაბამისი ნოტა შვეიცარიის საელჩოს ქართული ინტერესების სექციიდან 24 აგვისტოს მივიღეთ. ჩვენ გულწრფელად ვუსურვებთ საქართველოსა და ქართველ ხალხს, რომ რაც შეიძლება სწრაფად მოახდინოს ხანძრისა და მისი შედეგების ლიკვიდირება.

"საუბარია იმაზე, რომ ჩვენ მივიღეთ ნოტა შვეიცარიის საელჩოს ქართული ინტერესების სექციიდან 23 აგვისტოს. რაც შეეხება კარასინი-აბაშიძის საუბარს, შემიძლია გითხრათ რომ კონტაქტი ნარჩუნდება ამ დონეზე და დიალოგი მიმდინარეობს, თუმცა ამ ეტაპზე სხვა ინფორმაცია არ მაქვს,“- განაცხადა მარია ზახაროვამ „კურიერთან“ საუბრისას.

მარია ზახაროვას მიერ გაკეთებულ განცხადებასთან დაკავშირებით განმარტება ამ დრომდე არ კეთდება საქართველოს საგარეო უწყებაში. დიპლომატიურ უწყებაში ამბობენ, რომ საკმარისი იყო განმარტება რომელიც პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ გააკეთა.

აბაშიძემ მედიასთან საუბრისას განაცხადა, რომ მას ჰქონდა რუსეთის საგარეო საქმეთა მინისტრის მოადგილე გრიგორი კარასინთან კომუნიკაცია, რის შემდეგაც ქართულმა მხარემ გადაწყვიტა მიემართა რუსეთისთვის დახმარების თხოვნით.