2015-03-26 06:00

New York Times-ისთვის მიცემულ ინტერვიუში საფრანგეთში მომხდარი ავიაკატასტროფის გამოძიებაში ჩართულმა ჩინოვნიკმა სამშაბათს ჩამოვარდნილი Airbus A320-ის ტრაგედიის დეტალები გაამხილა: შავი ყუთის ჩანაწერით დასტურდება, რომ ერთერთმა პილოტმა კაბინა დატოვა და უკან დაბრუნებულმა, შიგ შესვლა ვეღარ შესძლო. 

ჩინოვნიკმა, რომელმაც ინკოგნიტოდ დარჩენა ისურვა, გამოცემას უთხრა, რომ შავი ყუთის ჩანაწერით დასტურდება სწორედ ეს ვერსია, რადგან ჩანაწერში ისმის, როგორ ცდილობს პილოტი კაბინის კარის შემტვრევას, თუმცა, მისი ყველა მცდელობა ამაო აღმოჩნდა: 

თვითმფრინავმა მართვა დაკარგა, 38.000 ფუტის სიმაღლიდან სწრაფად დაიწყო ვარდნა და საფრანგეთის სამხრეთით, ალპებში ჩავარდა. 144 მგზავრი და ეკიპაჟის ექვსივე წევრი დაიღუპა. დაღუპულთა შორის ორი ჩვილი და 17 მოზარდი იყო. თვითმფრინავი "ლუფტჰაზას" შვილობილ ავიაკომპანიას ეკუთვნოდა და ის რეისს დიუსელდორფიდან ბარსელონაში ასრულებდა. 

ტრაგედიას ფრანგული მხარე იძიებს. ამ დრომდე უცნობია, რატომ დატოვა კაბინა ერთმა პილოტმა, ხოლო უკან მიბრუნების მცდელობისას რატომ ვერ გააღო კარი. ასევე უცნობია, რას აკეთებდა ამ დროს მეორე პილოტი. ფაქტია, რომ რამდენიმე წუთიდან მას შემდეგ, რაც კარის შემტვრევის მცდელობა უშედეგო აღმოჩნდა, ლაინერმა სიმაღლის დაკარგვა დაიწყო.