„გვითხრეს, რომ რაღაც პროექტის განხილვა იქნებოდა“; „გვითხრეს, რომ ფილმი იქნებოდა, მაგრამ არ უთქვამთ, რის შესახებ“; „არ ვიცოდით, რომ აქ პოლიტიკური ფილმის ჩვენება იქნებოდა, ეს რომ გვცოდნოდა, საერთოდ არ მოვიდოდით“,
ამბობდნენ ფოთის თეატრში პარასკევს მასწავლებლებისთვის მიცემული დავალების შემდეგ მიყვანილი სკოლებისა და კოლეჯების მოსწავლეები, რომლებსაც „სააკაშვილის რეჟიმის სისხლიანი ქრონიკა“ აჩვენეს.
„ფილმი იყო იმაზე, თუ რა საშინელება იყო ეს ცხრა წელი... გავიგეთ ეს, ხო? ახლა იმაზე ილაპარაკონ, რას გააკეთებენ მომავალში“; „ჩემთვის მიუღებელია ამ კადრების ჩვენება არასრულწლოვნებისთვის“, - აცხადებდნენ ფილმის ჩვენების შემდეგ თეატრში მოტყუებით მიყვანილი მოსწავლეები.
შეგახსენებთ, ფოთსა და ზუგდიდში საჯარო სკოლების მოსწავლეებს ფილმი „სააკაშვილის რეჟიმის სისხლიანი ქრონიკა“ აჩვენეს. ჩვენების ინიციატორი არასამთავრობო ორგანიზაცია „ყველა თაობა საქართველოსთვის“ იყო. ფილმი 16 წუთს გრძელდება და მასში შეტანილია ე.წ. ციხის კადრებიც.
