მსახიობებს, რომლებიც ყოფილი პრემიერის, ბიძინა ივანიშვილის ფონდ „ქართუსგან“ დაფინანსებას იღებდნენ, ფინანსური დახმარება იანვრიდან აღარ მიუღიათ. ამის შესახებ ინფორმაცია News.ge-ს მსახიობმა ნინელი ჭანკვეტაძემ დაუდასტურა.
„იანვრიდან არ ყოფილა. გასაგებია, რომ ეს ძალიან დიდი დახმარებაა ნებისმიერი ჩვენგანისთვის. ეს არის ჩვეულებრივად საჩუქარი. თუ შეწყდება, რა უნდა თქვა? არაფერი უნდა თქვა. ადამიანის კერძო ფულია. უნდა მოგცემს, ვერ შეძლებს, არ მოგცემს. იმაზეც მადლობლები ვართ ყველანი, რაც ამ წლების განმავლობაში იყო.
ამიტომ, რომ გითხრათ, რომ სადმე დიდი ვნებათაღელვაა ატეხილი ამის თაობაზე - არა. ვიცი, რომ, ალბათ, ისევ გაგრძელდება. შეიძლება, არ გაგრძელდეს.
რასაკვირველია, ყველა ადამიანისთვის მძიმე იქნება, თუ არ მიიღებს, ბუნებრივია, მაგრამ ეს ჩვეულებრივი მომენტია. მე როგორც ვიცი, არც ჩემს კოლეგებში და არც არსად ამ მხრივ არანაირი ვნებათაღელვა არ არის“,-განაცხადა ჭანკვეტაძემ.
