შსს-ს საზოგადოებასთან ურთიერთობის სამსახური ეხმიანება დღის თემად ქცეულ რუსულ ტრანზიტისნომრიანი სატვირთო მანქანების გამოჩენას თბილისში და აცხადებს, რომ მანქანები კერძო პირის მიერ რუსეთშია შესყიდული და მას მესამე ქვეყანაში გასვლა ეკრძალება.
„სოციალურ მედიაში გავრცელდა ფოტოსურათები, სადაც დაფიქსირებულია სატვირთო ავტომანქანები რუსული სატრანზიტო ნომრებით. შინაგან საქმეთა სამინისტრო აღნიშნულ ავტომანქანებზე სრულ ინფორმაციას ფლობს.
ავტომანქანებს სამხედრო დანიშნულება არ გააჩნია და არავითარ საფრთხეს საქართველოს ან მისი მეზობელი ქვეყნების ინტერესებისთვის არ წარმოადგენს. სატვირთო ავტომანქანები შესყიდულია კერძო პირის მიერ რუსეთის ფედერაციაში. მათ მინიჭებული აქვთ სატრანზიტო ნომრები, რომლითაც მესამე ქვეყანაში გასვლა იკრძალება.
ავტომანქანების მფლობელი პირი იდენტიფიცირებულია, ხოლო აღნიშნული ავტომანქანები დგას თბილისში, მეორადი გამოყენებისა და სათადარიგო ნაწილებად რეალიზაციისათვის“, - წერს სოციალურ ქსელ „ფეისბუქში“ ნინო გიორგობიანი.
შეგახსენებთ, რომ მთელი დღის განმავლობაში სოცილაურ ქსელსა და სხვადასხვა მედიასაშუალებაში ვრცელდებოდა თბილისში გადაღებული ფოტოები, სადაც ჩანდა „ზილ-131“ დახურული ტიპის სატვირთო ავტომობილები. მსგავსი ავტომობილები სამხედრო სფეროში, უმეტესად, ქვეითების გადასაყვანად გამოიყენება.
„ზილ-131“ დღემდე ვარშავის ხელშეკრულების სხვადასხვა ქვეყნებშია გავრცელებული. რუსეთში კი გამოტანილია გასაყიდად სხვადასხვა მოძველებულ ტექნიკასთან ერთად, როგორიცაა, „ზილ-157“, „გაზ-66“, „ბრდმ“, „ბტრ-60(კოშკურის გარეშე) და სხვა.
რუსეთის თავდაცვის სამინისტროს მიერ აქუციონიც იყო გამოცხადებული ტექნიკის გასხვისების მიზნით.