2014-12-14 03:14

საყდრისი-ყაჩაღიანის ტერიტორიაზე სამუშაოების განახლებას "საყდრისის დაცვის კომიტეტის" წევრები და საყდრისის მცველები აპროტესტებდნენ. მოგვიანებით "საყდრისის მცველებმა" განაცხადეს, რომ ისინი პროტესტის სხვა ფორმებს უკვე კვირიდან მიმართავენ.

საყდრისის მცველები დიპლომატიურ კორპუსს, არასამთავრობო ორგანიზაციებსა და პოლიტიკურ პარტიებს მოუწოდებენ, ხმა აიმაღლონ იმ ვანდალიზმის წინააღმდეგ, რომელსაც დღევანდელი ხელისუფლება უშვებს. მათივე თქმით, არანაირი პრეტენზია აღარა აქვთ კომპანიასთან, რომელსაც სამუშაოების განახლების უფლება სახელმწიფომ მისცა. "პასუხი პრემიერმა და კულტურის მინისტრმა უნდა აგონ", - ამბობენ ისინი.

სამუშაოების განახლებასთან დაკავშირებით განმარტება დღეს ძეგლთა დაცვის სააგენტოშიც გაკეთდა, სადაც აცხადებენ, რომ შესაბამისმა კომისიამ საყდრისის თემაზე გუშინ იმსჯელა და სამუშაოების განახლების გადაწყვეტილებაც მიიღო.

როგორც "კურიერის" მიერ მომზადებულ სიუჟეტშია ნათქვამი, საყდრისის, როგორც არქეოლოგიური ობიექტის ისტორია 2004 წლიდან იწყება, როდესაც ქართულ-გერმანულმა ექსპედიციამ საბჭოთა გეოლოგების მიერ 80-იან წლებში გაყვანილ გვირაბებში ჩვ.წ.-მდე მე-4-ე ათასწლეულით დათარიღებულ კულტურულ ფენას მიაგნო და მსოფლიოში უძველესი ოქროს მაღაროს შესახებ განაცხადა. ექსპედიციას გერმანელი არქეოლოგი თომას შტოლნერი ხელმძღვანელობდა. 10-წლიანი კვლევის შემდეგ არქეოლოგი დღეს ფიქრობს, რომ საყდრისის დაზიანება უსამართლობაა.

საყდრისის თემას ეხმიანებიან საქართველოს მესამე პრეზიდენტი მიხეილ სააკაშვილი და კულტურისა და ძეგლთა დაცვის მაშინდელი მინისტრი ნიკა რურუა.

მიხეილ სააკაშვილი წერს:

"საყდრისის ოქროს საბადოს, უძველესი ქართული კულტურული, ოქროს საწმისის ეპოქის ფასდაუდებელი მატერიალური ძეგლის ბარბაროსული აფეთქება ძალიან მძიმე დარტყმაა ქართულ კულტურასა და ასევე მსოფლიო მემკვიდრეობაზე. რუსი მფლობელების მოთხოვნას და ვინმე უჩას, ივანიშვილის საყვარელი დეიდაშვილის სიხარბეს შეეწირა ჩვენი ისტორიული სიმდიდრე, რომელსაც საუკუნეების განმავლობაში, ქვეყნისთვის ბარაქა და სახელი უნდა მოეტანა, მოეზიდა ტურისტები. 

ის, რაც შევარდნაძის დროს მამალაძემაც კი, ვერ გაბედა და ჩემი პრეზიდენტობის დროს, რა თქმა უნდა, საერთოდ წარმოუდგენელი იყო, ერთი ოლიგარქის ახირებამ და მისი ნათესავების მატერიალურმა დაინტერესებამ შეიწირა.

თალიბების მიერ კლდეში გამოკვეთილი ბუდების აფეთქების შემდეგ ვერ ვიხსენებ ამ დონის ვანდალიზმს მსოფლიოში. ეს არის პირდაპირი შედეგი კორუფციის, უპასუხისმგებლობისა და უმეცრების, რომელიც ჩვენს ქვეყანაში, სულ უფრო და უფრო იკიდებს ფეხს ყველა მიმართულებით.

მოვუწოდებ ყველას ვისაც ეს ეხება, ახლა მაინც, შეაჩერებინონ უკანონო სამუშაოები, რათა ის მაინც გადავარჩინოთ, რისი გადარჩენაც ჯერ კიდევ შესაძლებელია. "

ნიკა რურუა აღნიშნავს, რომ საყდრისისთვის კულტურის ძეგლის სტატუსის შეჩერებას მისი მინისტრობის დროსაც ითხოვდნენ:

"რამდენიმე სიტყვა 'საყდრისის' საბადოს გარშემო დატრიალებული ამბის შესახებ: მე, კულტურის მინისტრის პოზიციაზე ყოფნისას, მთხოვდნენ მისთვის კულტურის ძეგლის სტატუსის მოხსნას ამ ბიზნესის წარმომადგენლები, რაზეც მტკიცე უარი მიიღეს. ჩემი პოზიცია იყო ამ საკითხის მიუკერძოებელი კომისიის მიერ შესწავლა და შემდეგ მიღება ინფორმირებული გადაწყვეტილებისა.

დღეს, აშკარაა, იმძლავრა ბიზნეს-ლობიმ ხელისუფლებაში და ამ საკითხის შეუსწავლელად ხდება ამ ობიექტის განადგურება, რაც უდაოდ უპასუხისმგებლო და დანაშაულებრივი ქმედებაა მმართველი კლანის მხრიდან".

ვიდეო: "კურიერის" რეპორტაჟი საყდრისიდან