2014-05-07 05:36

ხვალ, 7 მაისს თბილისში 1941–1945 წლების სამამულო ომში დაღუპული მამია ტაბატაძის ნეშტს ჩამოასვენებენ. მამია ტაბატაძე ამ დრომდე დაკარგულად იყო მიჩნეული.

სრულიად რუსეთის სამძებრო მოძრაობის ინფორმაციით, მისი ნეშტი ქალაქ სმოლენსკში გათხრების შედეგად აღმოაჩინეს. ადგილზე ნაპოვნია ასევე ჯარისკაცის კუთვნილი სარკე, მისი დოკუმენტების ნაწილი და მეომრის მედალიონი.

ჯარისკაცის ნეშტი რამდენიმე დღის წინ "რუსეთში ქართველთა კავშირის" წარმომადგენლებს გადაეცათ, რომლის დაფინანსებითაც მას სამშობლოში ჩამოასვენებენ. თბილისში მას კავშირის დირექტორი ნუგზარ ჭანტურია, ასევე სმოლენსკის სამძებრო ბრიგადის წარმომადგენლები ანდრეი ფეტისოვი, ევგენი მანუილოვი და მარინა პიროჟკოვა ჩამოაცილებენ.

ჯარისკაცის ნეშტს ხვალ თბილისის საერთაშორისო აეროპორტში ოჯახის წევრები და ახლობლები დახვდებიან, რომლებიც მას საჩხერეში, მშობლიურ სოფელ კორბოულში გადაასვენებენ.

სმოლენსკის სამძებრო კომიტეტის ინფორმაციით, 1941 წლის 16 ნოემბერს მოსკოვის ოლქის ლოტოშინსკის რაიონის სოფლებში ამიერკავკასიაში ფორმირებული მე–17 დივიზიის 200–მდე მებრძოლი დაიღუპა. საძიებო რაზმის წარმომადგენლის ვალერი ანანიევის მიერ "რუსეთში ქართველთა კავშირისთვის" მიწოდებული სიის თანახმად, ამ დრომდე უგზო–უკვლოდ დაკარგულად საქართველოდან საომრად წასული 40 ჯარისკაცი ითვლება.

აღსანიშნავია, რომ რუსული ალექსანდროვსკის იმპერიული კომიტეტის გადაწყვეტილებით, 2013 წლის 4 ნოემბერს ქართველ ჯარისკაცს სიკვდილის შემდეგ ჯილდო მიენიჭა.