2014-05-06 15:44

„არ მომერიდება და ვიტყვი, რომ მე და ჩემმა თანაგუნდელებმა თანამედროვე ქართული სახელმწიფოებრიობა შევქმენით“–განაცხადა საქართველოს მესამე პრეზიდენტმა მიხეილ სააკაშვილმა აზერბაიჯანულ გამოცემასთან ინტერვიუში.

როგორც მან  „haqqin.az“–ისთვის მიცემულ ინტერვიუში აღნიშნა, ის თავს ისევ დიდი პოლიტიკის ნაწილად თვლის, რადგან საერთაშორისო დონეზე მას მოქმედი სახელმწიფო მმართველები ეკონტაქტებიან.

„მე მირეკავენ სენატორები, მინისტრები, მოქმედი პრეზიდენტები... ანუ, არ მაქვს განცდა, რომ არავის ვჭირდები, ან ვიღაცამ გადამაგდო. მე აქტიურად ვმუშაობ. უკრაინის მოვლენებში ვიღებ მონაწილეობას. დღევანდელ დღეს, როცა „ფეისბუქი“ არსებობს, არ არის აუცილებელი, თანამდებობის პირი იყო, რომ პროცესებზე მოახდინო გავლენა. ჩემს პოსტებს „ფეისბუქში“ 600–700 ათასი ადამიანი კითხულობს, ანუ ჩვენ სხვა ეპოქის შვილები ვართ. ამიტომ ბევრი შეცდა, როცა ფიქრობდა, რომ პოლიტიკიდან სამუდამოდ მიშორებდა“ – განაცხადა მიხეილ სააკაშვილმა.

სააკაშვილი იმასაც აღნიშნავს, რომ მას ცოტა დასვენება უნდოდა, მაგრამ უკრაინის მოვლენებმა დიდი პოლიტიკაში დააბრუნა.

,,სამწუხაროდ ან საბედნიეროდ, უკრაინის მოვლენებმა დამაბრუნეს დიდ პოლიტიკაში. არ მინდოდა გამოჩენა, შესვენება მინდოდა, ჩემს თავზე მუშაობა, წიგნის დაწერა, აკადემიური გამოკვლევებით დაკავება მინდოდა; ვგეგმავდი, მეფიქრა წარსულსა და მომავალზე. ნიუ–იორკშიც კი დავბრუნდი, სადაც 90–იანებში ვცხოვრობდი, მარტო ვმგზავრობდი მეტროში, დავდიოდი მაღაზიებში. ყველაფერი ნულიდან დავიწყე. დავიღალე იმით, რომ დაცვა დამყვება, ჩემს ჩანთებს სხვა ატარებს, უამრავი ავტომობილი დამყვება...“ – განაცხადა მან.

 მისივე თქმით, თავად ბიძინა ივანიშვილმა შეხვედრისას უთხრა, რომ მისი როლი ქართულ პოლიტიკაში დასრულებული იყო და ამას უნდა შეგუებოდა სააკაშვილმა ეს დიალოგი ინტერვიუში გაიხსენა:

„მან მითხრა, დროა, შეეგუო, რომ ეს შენი დასასრულია ქართულ პოლიტიკაშიო, რაზეც მე ინგლისურად ვუპასუხე, „არასდროს თქვა, არასდროს“. მიუხედავად იმისა, რომ მან ინგლისური არ იცის, მიხვდა, რაც ვუთხარი.“

მან პოლიტიკა და სერფინგი შეადარა ერთმანეთს და განაცხადა, რომ ის ტალღის ქვეშ არ მოქცეულა, მხოლოდ წაიქცა.

„მე ეს კარგად ვიცი, რადგან სერფინგითაც და პოლიტიკითაც ვარ დაკავებული. მთავარი ისაა, რომ წყალქვეშ არ აღმოჩნდე. ჩვენი რეფორმების სწრაფი განვითარება მაფიქრებდა ხოლმე, რომ ადრე თუ გვიან, ტალღა დამფარავდა. კი, ტალღამ წამაქცია, თუმცა მე არ ჩავძირულვარ. ახლა ვტივტივებ...“– დასძინა სააკაშვილმა.

სააკაშვილმა კომენტარი მის დაკითხვაზე დაბარებაზეც გააკეთა და აღნიშნა, რომ საქართველოს ხელისუფლებას მისი სამართლებრივი დევნის დაწყება დასავლეთის მკაცრმა განცხადებებმა გადააფიქრებინა, მესამე პრეზიდენტი ფიქრობს, რომ ასეც რომ არ მომხდარიყო ამის ნებას ახალ ხელისუფლებას ქართველი ხალხი მაინც არ მისცემდა.

,,იყო რამდენიმე მცდელობა, რომ ჩემს წინააღმდეგ სისხლის სამართლის საქმე აღძრულიყო, თუმცა საქართველოს ხელისუფლებამ ვაშინგტონისა და ევროკავშირის უმაღლესი წრეებიდან გაფრთხილებები მიიღო, რის შემდეგაც შეცვალა დამოკიდებულება. რომ არა ამერიკელი და ევროპელი კოლეგები, პირველ რიგში, ამის უფლებას თავად ქართველი ხალხი არ მისცემთ. საქართველოში ყველამ იცის, რომ არასდროს ვყოფილვარ კორუმპირებული, იმიტომ, რომ ჩემი მმართველობის დროს კორუფცია არ არსებობდა და ხალხს ეს ახსოვს“ – განაცხადა სააკაშვილმა.

მისივე თქმით, ახლა საქართველოში რთული პერიოდია, ქვეყნის განვითარება არ ხდება, თუმცა სააკაშვილი თვლის, რომ საქართველო ასე სწრაფად უკუსვლას არ დაიწყებს და არ დაინგრევა, რადგან მისი და მისი გუნდის შექმნილი ძლიერი ინსტიტუტები ინერციით ისევ აძლიერებს ქვეყანას.