2014-05-06 15:19

 “არ მინდა, რომ საქართველო დაბრუნდეს სააკაშვილის ეპოქაში, როდესაც თითოეულ მოქალაქეს უსმენდნენ,”– ამის შესახებ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილმა განაცხადა.

პეტრიაშვილი ამ კომენტარით  უკანონო მოსმენებთან დაკავშირებით “რუსთავის 2”-ის განცხადებას გამოეხმაურა. 

“ზოგადად, უკანონო მოსმენების თემა ძალიან ცუდია. ნამდვილად არ მინდა, რომ საქართველო დაბრუნდეს სააკაშვილის ეპოქაში, როდესაც უსმენდნენ თითოეულ მოქალაქეს, თითოეულ ოჯახს და არა მხოლოდ ტელევიზიებში, არამედ საძინებლებსა და სამზარეულოებში იყო კამერები დაყენებული. ამას შესაბამისი გამოძიება და რეაგირება სჭირდება,დარწმუნებული ვარ, თუკი ეს ასე იქნება, რეაგირებაც იქნება”, - განაცხადა ალექსი პეტრიაშვილმა.

შეგახსენებთ, რომ „რუსთავი 2“-მა საგანგებო განცხადება გააკეთა, რომლის მიხედვითაც, ტელეკომპანიაში ხელმძღვანელობისა და ჟურნალისტების ფარული მოსმენა ხდებოდა.