2014-05-06 14:03

საქართველოს მთავარმა პროკურატურამ "რუსთავი 2"-ის საქმესთან დაკავშირებით გამოძიება დაიწყო. საგამოძიებო ჯგუფი ტელეკომპანიაში უკვე შესულია.

როგორც პროკურორმა კოკა კაციტაძემ განაცხადა, გამოძიება ყველა იმ ჩანაწერსა და ტექნიკურ მოწყობილობას ამოიღებს, რომელზეც ტელეკომპანია ფიქრობს, რომ საეჭვოა.

"გამოძიება მიმდინარეობს საქართველოს სისხლის სამართლის კოდექსის 158-ე მუხლის საფუძველზე, რაც გულისხმობს კერძო საუბრების, კერძო კომუნიკაციის, საიდუმლოს დარღვევას. მთავარ პროკურატურაში შექმნილია საგამოძიებო ჯგუფი, რომელიც ჩაატარებს ყველა საგამოძიებო მოქმედებას და ღონისძიებას, რათა საქმეზე დადგინდეს ობიექტური ჭეშმრიტება.

ამავდროულად, ჩვენ მივმართავთ "რუსთავი 2"-ის თანამშრომლებს, რომ აქტიურად ითანამშრომლონ საგამოძიებო სამსახურთან, რათა უმოკლეს დროში მოხდეს გავრცელებული ვიდეომასალის წარმომავლობის და შესაძლო დანაშაულში მონაწილე ყველა პირის გამოვლენა", - განაცხადა კაციტაძემ.