მამა დავით ლასურაშვილმა გადაცემა „პოზიციაში“ გამოსვლისას განაცხადა, რომ კონკორდატის მიხედვით, სახელმწიფო თანაბარუფლებიან სუბიექტად აღიარებს ეკლესიას, რაც ნიშნავს, რომ ეკლესია აღიარებს სახელმწიფოში არსებულ და მიღებულ კანონებს, რომლებიც არ მიდის ღვთის გმობისკენ და თავის მხრივ, სახელმწიფო აღიარებს ეკლესიას თანაბარუფლებიან სუბიექტად.
„თუმცა, საქართველო არის სეკულარული სახელმწიფო“, - წამყვანის ამ რეპლიკაზე მამა დავითმა უპასუხა: „ძალიან გთხოვთ, ახლა ნუ გადამიყვანთ პოლიტიკურ პოლემიკაში, და ნუ წარმოაჩენთ ახლა ისე, როგორც თქვა პარლამენტის თავმჯდომარემ, რომ თითქოს ვინც ეწინააღმდეგება ამ კანონს, მას არ სურს საქართველოს სვლა ევროპისკენ და რუსეთში შესვლა უნდა - ასეთი განცხადებები ამ განცხადების ავტორთა ინტელექტზეც მიუთითებენ“.
მამა დავითმა ასევე აღნიშნა, რომ „საპოლემიკო ეკლესიას არაფერი სჭირს“ და ამ კონტექსტში განიხილა „პოზიციის“ ეთერში „სხვა სასულიერო პირის“ (მამა ილია ვაშაკიძის, -რედ.) გამოჩენა, რის გამოც სტუდიაში დარჩენაზე უარი განაცხადა:
„ჩერგოლეიშვილის ტელევიზიას ნუ დაემსგავსებით“, - მიმართა მამა დავითმა „პოზიციის“ წამყვანს, ხოლო მის პასუხზე: „რას ნიშნავს, მამა დავით, ეს? თქვენ მედიასაშუალებაზე საუბრობთ“, უპასუხა:
„კი ბატონო, არ ვახსენებ მის სახელს, რადგან არ გინდათ, მაგრამ მან და მისმა ოჯახმა რა დღემდე მიგვიყვანა, კარგად ვხედავთ...“
