25 მაისს თურქეთში მცხოვრები ქართველები უკვე მეორედ აღნიშნავენ საქართველოს დამოუკიდებლობის დღისადმი - 26 მაისისადმი მიძღვნილ ღონისძიებას, რომელსაც „ქართული ზეიმი“ ჰქვია.
„ქართული ზეიმი“ პირველად შარშან გაიმართა. „ქართული ზეიმის“ ტრადიციულ ზეიმად ჩამოყალიბების ინიციატორია „მარმარილოს რეგიონების ქართველთა საზოგადეობა“.
საზეიმო ღონისძიება იმართება საქარიას რაიონში, ორმანში. დილის 11 საათიდან, საღამოს 19 საათამდე. ღონისძიებაზე დასწრებას გეგმავენ თურქეთის ქართული სათვისტომოებისა და კულტურის დაწესებულებების წევრები, ასევე, ქართველები თურქეთის სხვადასხვა რეგიონებიდან.
„ქართული ზეიმი“ იმართება ღია ცის ქვეშ. შეკრების პარალელურად გაიმართება თურქეთში არსებულ ქართულ ანსამბლთა კონცერტი. კონცერტში მონაწილეობს ორი ანსამბლი „სტამბოლის ქართული ხელოვნების სახლიდან“ ქართული და კავკასიური ფოლკლორული ანსამბლი „კაფდაღი“, ხელმძღვანელი იბერია მელაშვილი და ქართული ცეკვის ანსამბლი ხელმძღვანელი იუქსელ კაჰრამანი-ფუტკარაძე; მოცეკვავეთა ჯგუფი ინეგოლიდან, ასევე, ლაზური სიმღერების შემსრულებელები საქართველოდან - ჯგუფი „შურიმშინე“.
ღონისძიებას დაესწრება საქართველოს ელჩი თურქეთის რესპუბლიკაში ბატონი ირაკლი კოპლატაძე მეუღლესთან ერთად.
„ქართულ ზეიმს“ უერთდებიან საქართველოს საზოგადოებრიობის წარმომადგენელები, რომელთაც მჭიდრო კულტურული ურთიერთობა აქვთ თურქეთის ქართველებთან: ივანე ჯავახიშვილის სახელობის სახელმწიფო უნივერსიტეტიდან, პროფესორი როზეტა გუჯეჯიანი, ხელნაწერთა ეროვნული ცენტრის დირექტორი ბუბა კუდავა. საქართველოს პარლამენტის ეროვნული ბიბლიოთეკიდან - ბატონი კაკი კენჭოშვილი და სხვები.
