2020-03-17 20:21

ჯანდაცვის მინისტრის, ეკატერინე ტიკარაძის განცხადებით, მოსალოდნელია ვირუსის მეტად გავრცელება, თუმცა ჯანდაცვის სისტემა მზადაა მიიღოს გაზრდილი ნაკადი. მისივე თქმით, ვირუსის გავრცელების შეჩერების მიზნით, მნიშვნელოვანია სოციალური დისტანცირება, რაც მოსახლეობამ აუცილებლად უნდა გაითვალისწინოს.

"როგორც მთავრობის მეთაურმა განაცხადა, ჩვენ გადავდივართ ახალ რეჟიმზე, ეს არის კვლავ პრევენციული რეჟიმი, ოღონდ უფრო მეტად გამკაცრებული, რაც იმას ნიშნავს, რომ ჩვენ უფრო მეტად მოგვიწევს ჩვენი მოქალაქეების გაკონტროლება იმისათვის, რომ მათ მოახდინონ სოციალური დისტანცირება "- აღნიშნა მინისტრმა.

ეკატერინე ტიკარაძის თქმით, ჯანდაცვის სისტემა პაციენტების პირველი ტალღის მისაღებად მზად იყო.

„ეს პირველი ტალღა რეალურად სისტემას უკვე მიღებული ჰყავს, ახლა უკვე ველოდებით შედარებით მეტ გავრცელებას მოსახლეობაში, რაც იმას ნიშნავს, რომ ჩვენ ბოლო კვირის მანძილზე აღვწერეთ ყველა დამატებითი საავადამყოფო, რომლის ჩართვასაც ვაპირებთ ამ პროგრამაში და ეს არის დამატებით 600-მდე საწოლი, რომელიც დაახლოებით 24-დან 48 საათის განმავლობაში იქნება მზად პაციენტებისთვის“, - განაცხადა მინისტრმა.

მისივე თქმით, ამ ეტაპზე საკმარისია როგორც ხელოვნური სუნთქვის აპარატების, ასევე იმ მედპერსონალთა რაოდენობა.

„მინდა დავამშვიდო მოსახლეობა: ჩვენ არ გვყავს ისეთი მძიმე პაციენტი, რომელსაც ესაჭიროება ხელოვნური სუნთქვის აპარატი. თუმცა, მიუხედავად ამისა, დღეისათვის მომზადებული გვაქვს ხელოვნური სუნთქვის 150 აპარატი. საჭიროების შემთხვევაში მოხდება მათი გამოყენება. ჩვენ ასევე ვმუშაობთ როგორც პირველადი ჯანდაცის რგოლთან, ასევე ჩვენს სხვა ექიმებთან, რომლებიც ამ პაციენტებს სტაციონარში მკურნალობენ. დღეისთვის მათი რაოდენობა არის საკმარისი, ისინი არიან მზად და ეტაპობრივად გადიან გარკვეულ კონსულტაციებს და ტრენინგებს იმის შესაფერისად, თუ რა საჭიროება დგება ყოველ შემდეგ ნაბიჯზე“, - განაცხადა ტიკარაძემ.