2015-12-04 22:40

საქართველოს პრეზიდენტის გიორგოი მარგველაშვილის განცხადებით, მიხეილ სააკაშვილმა საქართველოს მიაყენა შეურაცხყოფა, როცა მის მოქალაქეობაზე უარი თქვა. 

„პოლიტიკურად, მინდა გითხრათ, ის, რომ სააკაშვილმა უარი თქვა საქართველოს მოქალაქეობაზე, ჩემგან მხოლოდ მძიმე შეფასებას იმსახურებს, იმიტომ, რომ ამით რეალურად, საქართველოს ყოფილმა პრეზიდენტმა შეურაცხყოფა მიაყენა როგორც პრეზიდენტის ინსტიტუტს, ასევე ჩვენს ქვეყანას“, – განაცხადა გიორგი მარგველაშვილმა.

შეგახსენებთ, გიორგი მარგველაშვილის გადაწყვეტილებით, საქართველოს მოქალაქეობა შეუწყდა საქართველოს მესამე პრეზიდენტს მიხეილ სააკაშვილს. იუსტიციის მინისტრმა სააკაშვილისთვის მოქალაქეობის შეწყვეტის რეკომენდაციით პრეზიდენტს გუშინ, 3 დეკემბერს მიმართა. 

სოციალურ ქსელ "ფეისბუქში", ძირითადად, უარყოფითად ეხმიანებიან მიხეილ სააკაშვილისთვის მოქალაქეობის შეწყვეტას. მაგალითად, ელენე ხოშტარია წერს: "მიშა სააკაშვილისთვის მოქალაქეობის ჩამორთმევა არის ისტორიული უსამართლობა და ჩვენი ქვეყნის რაღას გაუმართაობაზე მიუთითებს. არასდროს არ მომრიდებია მისი კრიტიკა, მაგრამ არ შეიძლება არ გესმოდეს მისი წვლილი ქვეყნის ჩამოყალიბებაში და გაძლიერებაში".

ოდნავ განსხვავებული აზრი აქვს უკრაინაში მყოფ ქართველს ბაჩო ქორჩილავას: "აქ ახლა ყველა განიხილავს მიხეილ სააკაშვილისთვის საქართველოს მოქალაქეობის შეწყვეტის საკითხს, თითქოსდა რაღაც ისეთი მოხდა, რაც ფანტასტიკის სფეროდანაა. სინამდვილეში არაფერია საგანგაშო. პირველ რიგში, ახლა ყველამ იცის, რომ სააკაშვილი უკრაინის მოქალაქეა და არსადაც არ წავა, რადგან სხვა ქვეყნის პასპორტი არა აქვს.

მეორეც, ვინც საქართველოს მესამე პრეზიდენტი მოქალაქეობის გარეშე დატოვა, მგონი, მალე მიხვდება, რომ სულ ტყუილად მოიქცა ასე: ამ ქმედების ინიციატორს ხომ ორი კი არა, სამი პასპორტი აქვს - ქართული, რუსული და ფრანგული".