საგარეჯოს საარჩევნო ოლქში შუალედური საპარლამენტო არჩევნები კოალიცია „ქართული ოცნების“ კანდიდატმა თამარ ხიდაშელმა მოიგო 574 ხმით. ამის შესახებ კახეთის საინფორმაციო ცენტრს რესპუბლიკური პარტიის თავმჯდომარემ, ხათუნა სამნიძემ განუცხადა. არსებული ინფორმაციით, თამარ ხიდაშელმა 7572 ხმა მიიღო, ირმა ინაშვილმა 6998.
„ყველა საარჩევნო უბნიდან გვაქვს უკვე ოქმები. 574 ხმით მოვიგეთ არჩევნები“, – აღნიშნა სამნიძემ.
კახეთის საინფორმაციო ცენტრის ინფორმაციით, თამარ ხიდაშელმა დიდი უპირატესობით გაიმარჯვა ეთნიკური აზერბაიჯანელებით დასახლებულ სოფლებში.
საგარეჯოს საოლქო - საარჩევნო კომისიაში საარჩევნო უბნებიდან კენჭისყრის შედეგების შემაჯამებელი ოქმების მიღება ახლა მიმდინარეობს.
2015 წლის 31 ოქტომბრის საქართველოს პარლამენტის შუალედური არჩევნებისთვის საგარეჯოს საარჩევნო ოლქში სულ 49 საარჩევნო უბანია და 46 082 ამომრჩეველია რეგისტრირებული. აქედან 12 საარჩევნო უბანი სოფელ იორმუღანლოშია, რომელიც კომპაქტურად ეთნიკური აზერბაიჯანელებით არის დასახლებული.
ოფიციალური მონაცემებით, შუალედურ არჩევნებში 15 867–მა ამომრჩეველმა მიიღო მონაწილეობა, რაც ამომრჩევლების საერთო რაოდენობის 34.43%–ია. არჩევნების მონაწილეთაგან 6946 ქალია, რაც ამომრჩევლების საერთო რაოდენობის 43,15%-ია.
