2015-10-31 23:33

„როდესაც ჩვენი ქვეყნის მოქალაქე  იღებს უცხო ქვეყნის მოქალაქეობას მას უწყდება საქართველოს მოქალაქეობა, სამართლებრივად აქ გადასაწყვეტი აღარაფერი იყო, სხვა საკითხია პოლიტიკური საფუძველი, ეს კანონი ნებისმიერ მოქალაქეზე ვრცელდება და სხვა გადაწყვეტილება ვერ იქნებოდა მიღებული“ -

ასე აფასებს იურისტი ლევან ალაფიშვილი იუსტიციის მინისტრის განცხადებას იმის შესახებ, რომ იუსტიციის სამინისტრომ მიხეილ სააკაშვილისთვის საქართველოს მოქალაქეობის შეწყვეტის პროცედურები დაიწყო.

„ნიკა გვარამია არის კომპანიის დირექტორი და იგი პასუხისმგებელია ნებისმიერ საკითხზე რაც „რუსთავი 2“-ს უკავშირდება,  სასამართლო გადაწყვეტილება რაც წილებთან არის დაკავშირებული იძულებითი აღსრულების ღონისძიებებს არ საჭიროებს, წილების საკუთრებასთან დაკავშირებით გადაწყვეტილება ერთ დღეში აღსრულდება, თუკი სასამართლოს გადაწყვეტილებით შეიცვლება მესაკუთრე ამ შემთხვევაში აღსრულებას რიგითი მოქალაქეები ვერც გაიგებენ, ცვლილება დარეგისტრირდება  საჯარო რეესტრში, იძულებითი აღსრულების პერსპექტივა საფუძველს მოკლებელია“ - აცხადებს ალაფიშვილი.

მისი თქმით სიმართლე იცის ორივე მხარემ, თუმცა ისინი საზოგადოებას აწვდიან არასრულ ინფორმაციას, ამ შემთხვევაში სასამართლო და სახელმწიფო ორგანოები მოწოდების სიმაღლეზე უნდა იყვნენ, როცა ხედავენ, რომ არ ვრცელდება სრულყოფილი ინფორმაცია, უნდა გაკეთდეს სპეციალური განცხადებები.

ადვოკატი განმარტავს, რომ დაუყოვნებლივი აღსრულების შესახებ შუამდგომლობის არ არსებობის შესახებ საზოგადოებას უნდა ჰქონოდა ინფორმაცია იმისათვის რომ ნაკლები მღელვარება ყოფილიყო. რაც შეეხება სატელეფონო საუბრების ჩანაწერებს, ალაფიშვილი ამბობს, რომ ბრალის წაყენებისთვის საჭიროა კანონიერ მტკიცებულებათა ერთობლიობა „ ბრალეულობა ნიშნავს ბრალის წაყენებას, მხოლოდ გუშინდელი ჩანაწერები ბრალის წაყენების საფუძველი არ არის, უნდა არსებობდეს სხვა მტკიცებულებებიც, ამასთან გამოსარკვევია ჩანაწერების მოპოვების კანონიერებაც“ - აცხადებს იურისტი.

ლევან ალაფიშვილის განცხადებით თუნდაც ის გარემოება, რომ ორი მხარე შესულია სამართლებრივ პროცედურებში წარმოაჩენს დღევანდელი სასამართლოსადმი ნდობის საკითხს, ადვოკატის თქმით სასამართლოზე პირდაპირი ზეწოლის ნიშნები არ იკვეთება თუმცა ეს იმას არ ნიშნავს, რომ სასამართლო არ შეიძლება მოექცეს ზეგავლენის ქვეშ.

რადიო "მაესტრო"